Author: Sandhya

 സമാധാനപരമായി സമരംചെയ്യുന്ന കർഷകർക്കെതിരേ കേന്ദ്രവും വിവിധ സംസ്ഥാനങ്ങളും സ്വീകരിക്കുന്ന നടപടികൾ ചോദ്യംചെയ്ത് സുപ്രീംകോടതിയിൽ ഹർജി. താങ്ങുവില ഉൾപ്പെടെയുള്ള ആവശ്യങ്ങളുമായി ഡൽഹി ലക്ഷ്യമാക്കി നീങ്ങുന്ന കർഷകർക്കെതിരായ കണ്ണീർവാതകപ്രയോഗം, അറസ്റ്റ്, സാമൂഹികമാധ്യമ അക്കൗണ്ടുകൾ തടയൽ തുടങ്ങിയവ അവരുടെ അവകാശലംഘനമാണെന്നു ചൂണ്ടിക്കാട്ടിയാണ് ഹർജി. ഹരിയാണ, ഉത്തർപ്രദേശ്, മധ്യപ്രദേശ് സർക്കാരുകൾ കർഷകർക്കെതിരേ നടത്തുന്ന ബലപ്രയോഗങ്ങൾ നിയമലംഘനമാണെന്ന് സിഖ് ചേംബർ ഓഫ് കൊമേഴ്‌സ് മാനേജിങ് ഡയറക്ടർ ആഗ്നോസ്‌തോസ് തിയോസ് സമർപ്പിച്ച ഹർജിയിൽ ആരോപിച്ചു.

 ജാമ്യംനൽകുന്നതുമായി ബന്ധപ്പെട്ട് പ്രത്യേക നിയമം നിർമിക്കുന്നത് പരിഗണനയിലുണ്ടോയെന്ന് കേന്ദ്രത്തോട് സുപ്രീംകോടതി. ക്രിമിനൽക്കേസ് പ്രതികൾക്ക് ജാമ്യം നൽകുന്നതുമായി ബന്ധപ്പെട്ട് പ്രത്യേക നിയമം നിർമിക്കുന്നകാര്യം പരിഗണിക്കണമെന്ന് 2022 ജൂലായിൽ സുപ്രീംകോടതി ആവശ്യപ്പെട്ടിരുന്നു. ഇത് നടപ്പാക്കുന്നുണ്ടോയെന്നാണ് ജസ്റ്റിസ് എം.എം. സുന്ദരേഷ് അധ്യക്ഷനായ ബെഞ്ച് ആരാഞ്ഞത്. കൂടാതെ, സി.ബി.ഐ. കേസുകളിലെ വിചാരണ വേഗത്തിലാക്കാൻ കൂടുതൽ പ്രത്യേക കോടതികൾ സ്ഥാപിക്കുന്നതിനെക്കുറിച്ച് പരിശോധന നടത്തിയിട്ടുണ്ടോയെന്നും കേന്ദ്രത്തോട് സുപ്രീംകോടതി ചോദിച്ചു. കേസ് മേയ് ഏഴിന് സുപ്രീംകോടതി വീണ്ടും പരിഗണിക്കും.

സെക്കന്തരാബാദ് കന്റോൺമെന്റ് എം.എൽ.എ. ലാസ്യ നന്ദിത (37) വാഹനാപകടത്തിൽ മരിച്ചു. സംസ്ഥാനപാതയിൽ ഹൈദരാബാദിനടുത്ത പട്ടാൻചെരുവിൽ എം.എൽ‍.എ. സഞ്ചരിച്ചിരുന്ന കാർ ഡിവൈഡറിലിടിക്കുകയായിരുന്നു. വെള്ളിയാഴ്ച രാവിലെ 6.15-ഓടെയായിരുന്നു അപകടം. എം.എൽ.എ.യെ സമീപത്തെ ആശുപത്രിയിലെത്തിച്ചെങ്കിലും രക്ഷിക്കാനായില്ല. കാറിലുണ്ടായിരുന്ന അവരുടെ സെക്രട്ടറിയും ഡ്രൈവറും ഗുരുതരമായ പരിക്കുകളോടെ ചികിത്സയിലാണ്.പത്തുദിവസം മുമ്പ് ലാസ്യ നന്ദിത മറ്റൊരു റോഡപകടത്തിൽനിന്ന് അദ്‌ഭുതകരമായി രക്ഷപ്പെട്ടതായിരുന്നു.രണ്ടുമാസം മുമ്പ് നടന്ന തിരഞ്ഞെടുപ്പിലാണ് ലാസ്യ നന്ദിത സെക്കന്തരാബാദ് കന്റോൺമെന്റ് മണ്ഡലത്തിൽനിന്ന് ബി.ആർ.എസ്. എം.എൽ.എ.യായി തിരഞ്ഞെടുക്കപ്പെട്ടത്.