കലഞ്ഞൂരിൽ അജ്ഞാതന്റെ ആസിഡ് ആക്രമണത്തിൽ വ്യാപാരിക്ക്‌ പരിക്ക്

പത്തനംതിട്ട: കൊടുമൺ കലഞ്ഞൂരിൽ അജ്ഞാതന്റെ ആസിഡ് ആക്രമണത്തിൽ വ്യാപാരിക്ക്‌ പരിക്കേറ്റു. കലഞ്ഞൂർ ക്ഷേത്രത്തിന് സമീപം എംപയർ ഇലക്ട്രിക് ആൻഡ്‌ പ്ലംബിങ്‌ എന്ന സ്ഥാപനം നടത്തുന്ന അനൂപ് ഭവനിൽ അനു(34) വിനാണ് പരിക്കേറ്റത്. അനുവിന്റെ മുഖത്തും നെഞ്ചിലും ഇരുകൈകളിലും പൊള്ളലേറ്റു.

ശനി രാത്രി എട്ടോടെയായിരുന്നു ആക്രമണം. കലഞ്ഞൂർ ജങ്‌ഷനിൽനിന്ന് ബൈക്കിൽ വീട്ടിലേക്ക് പോകവേ, ഡിപ്പോ ജങ്‌ഷന് സമീപത്തുവച്ച്‌ മുഖംമറച്ച ആൾ ചാടി വീണ് ആസിഡ് ഒഴിക്കുകയായിരുന്നുവെന്നാണ്‌ അനൂപിന്റെ മൊഴി. വീടിന്‌ പരിസരത്തായിരുന്നതിനാൽ അച്ഛനും മറ്റ് സുഹൃത്തുക്കളും ചേർന്ന് അടൂരിലെ സ്വകാര്യാശുപത്രിയിൽ എത്തിച്ചു.