റമദാൻ; അബുദാബി ഷെയ്ഖ് സായിദ് വലിയ പള്ളിയിലേക്ക് സൗജന്യ ബസ് സൗകര്യം

റമസാനിൽ അബുദാബി ഷെയ്ഖ് സായിദ് വലിയ പള്ളിയിലേക്ക് അധികൃതർ സൗജന്യ ബസ് സൗകര്യമൊരുക്കി. പള്ളിയെ അൽ റബ്ദാൻ പ്രദേശത്തെ ബസ് ഇന്റർചേഞ്ചുമായി ബന്ധിപ്പിക്കുന്ന 10 സൗജന്യ ബസുകൾ സർവീസ് നടത്തുമെന്ന് മുനിസിപ്പാലിറ്റികളുടെയും ഗതാഗത വകുപ്പിന്റെയും അഫിലിയേറ്റായ ഇന്റഗ്രേറ്റഡ് ട്രാൻസ്‌പോർട്ട് സെന്ററായ അബുദാബി മൊബിലിറ്റി അറിയിച്ചു.

വ്രതമാസം മുഴുവൻ സുഗമവും സുരക്ഷിതവുമായ ഗതാഗതം ഉറപ്പാക്കാൻ ഇത് സഹായിക്കും. റമസാനിലെ അവസാന 10 ദിവസങ്ങളിൽ, പ്രത്യേകിച്ച് തറാവീഹ് സമയത്തും രാത്രി വൈകിയുള്ള പ്രാർഥനാ സമയത്തും ഗതാഗതം വർധിപ്പിക്കുന്നതിനും പള്ളിക്ക് ചുറ്റുമുള്ള തടസ്സമില്ലാത്ത ഗതാഗതം ഉറപ്പാക്കുന്നതിനും ഈ സംരംഭം ലക്ഷ്യമിടുന്നു.