അയൽവാസികൾ തമ്മിൽ സംഘർഷം; യുവാവിന് വെട്ടേറ്റു

അയൽവാസികൾ തമ്മിലുണ്ടായ സംഘർഷത്തിനിടെ യുവാവിന്റെ തലയ്ക്ക് വാക്കത്തിക്ക് വെട്ടേറ്റു. കാലായിൽ ഏബിൾ (18) എന്ന യുവാവിനാണ് വെട്ടേറ്റത്. ഇയാളെ വണ്ണപ്പുറത്തെ സ്വകാര്യ ആശുപത്രിയിൽ പ്രവേശിപ്പിച്ച് തലയ്ക്ക് ഏഴ് തുന്നലിട്ടു. പിന്നീട് കൂടുതൽ പരിശോധനയ്ക്കായി തൊടുപുഴ ജില്ലാ ആശുപത്രിയിയിലേക്ക് കൊണ്ടുപോയി.

തിങ്കളാഴ്ച രാവിലെ 11.30-ന് വണ്ണപ്പുറം ഓലിക്കൽ ഷിഹാബിന്റെ വീട്ടിലാണ് സംഘർഷമുണ്ടായത്. ഷിഹാബിന്റെ മകൻ ഹാരിസിന്റെ സുഹൃത്താണ് ഏബിൾ. ഷിഹാബും അയൽവാസിയായ പുതുശ്ശേരിൽ ശ്രീജിത്തും തമ്മിൽ കഴിഞ്ഞ ദിവസം പ്രശ്‌നങ്ങളുണ്ടായിരുന്നു. ഞായറാഴ്ച വൈകീട്ട് ഏഴിന് ഷിഹാബിന്റെ വീട്ടുമുറ്റത്തുകിടന്ന തുണി അയൽവാസി പെട്രോൾ ഒഴിച്ചു കത്തിക്കുകയും വീട്ടിലേക്ക്‌ വൈദ്യുതിയെത്തുന്ന സർവീസ് വയർ മുറിക്കുയും മീറ്റർ അടിച്ചുതകർക്കുകയും ചെയ്തിരുന്നു.