സാംസങ് ഗാലക്സി എസ്25 അ‌ൾട്ര പുത്തൻ കളർ ഓപ്ഷനിൽ ഇന്ത്യയിലേക്ക്

സാംസങ് ഗാലക്സി എസ്25 അ‌ൾട്ര പുത്തൻ കളർ ഓപ്ഷനിൽ ഇന്ത്യയിലേക്ക് . എന്നാൽ വരാൻ പോകുന്ന കളർ ഓപ്ഷന്റെ പേര് കമ്പനി ഇതുവരെ വ്യക്തമായി വെളിപ്പെടുത്തിയിട്ടില്ല, പക്ഷേ ടീസർ ഇമേജിൽ നിന്ന് ലഭിക്കുന്ന സൂചന പ്രകാരം ഇരുണ്ട കളർ ആയിരിക്കും. ഇതിന്റെ കൂടുതൽ ഡീറ്റെയിൽസ് വരുംദിവസങ്ങളിൽ വ്യക്തമാകും.പുതിയ കളർ ഓപ്ഷനിൽ ലഭ്യമാകും എന്നതിനപ്പുറം ഗാലക്സി എസ്25 അ‌ൾട്രയുടെ ഫീച്ചറുകളിൽ മാറ്റമുണ്ടാകില്ല. പക്ഷേ വിലയുടെ കാര്യത്തിൽ മാറ്റമു​ണ്ടാകുമോയെന്ന് ഇപ്പോൾ പറയാറായിട്ടില്ല. സാംസങ് ഗാലക്സി എസ്25 അ‌ൾട്രയുടെ 12GB + 256GB അ‌ടിസ്ഥാന വേരിയന്റിന് 1,29,999 രൂപയും 12GB + 512GB വേരിയന്റിന് 1,41,999 രൂപയും 12GB + 1TB ടോപ് വേരിയന്റിന് 1,65,999 രൂപയുമാണ് ലോഞ്ച് വില.

ലോഞ്ച് ചെയ്ത് രണ്ട് മാസം പിന്നിട്ടതിനാൽത്തന്നെ ഗാലക്സി എസ്25 അ‌ൾട്രയുടെ ആവേശം ഒന്ന് തണുത്തിട്ടുണ്ട്. ഇതിനെ ഒന്ന് ചൂടാക്കിയെടുക്കാനും കച്ചവടം വീണ്ടും ഉഷാറാക്കാനും പുതിയ കളർ ഓപ്ഷന്റെ അ‌വതരണത്തിലൂടെ സാംസങ് ലക്ഷ്യമിടുന്നുണ്ട് എന്നാണ് വിലയിരുത്തപ്പെടുന്നത്. ഏറ്റവും പുതിയ എഐ ഫീച്ചറുകളുടെ പിന്തുണയും കരുത്തൻ സ്‌നാപ്ഡ്രാഗൺ 8 എലൈറ്റ് ചിപ്സെറ്റിന്റെ പിൻബലവും സഹിതമാണ് ഗാലക്സി എസ്25 സീരീസ് എത്തുന്നത്.