വയലറ്റ് നിറത്തിൽ അതീവ സുന്ദരിയായി മൂന്നാർ

മൂന്നാറിന് എന്നും ഒരു പ്രത്യേക സൗന്ദര്യമാണ്. കാലങ്ങൾക്കനുസരിച്ച് നിറത്തിലും മാറ്റം വരാറുണ്ട്. സെപ്റ്റംബർ ഒക്ടോബർ മാസങ്ങളിൽ ചുവപ്പ് നിറത്തിൽ സ്പാത്തോഡിയ മരങ്ങൾ പൂത്തുലയുമെങ്കിൽ വയലറ്റ് വസന്തത്തിന് തുടക്കമാകുന്നത് ഫെബ്രുവരി അവസാനത്തോടെയാണ്. ഇലകൾ പൊഴിച്ച് വയലറ്റ് നിറത്തിൽ ജക്കറാന്തകൾ പൂവിട്ട് നിൽക്കുന്ന കാഴ്ച കണ്ണിലും മനസ്സിലും കുളിരണിയിക്കും. കൂട്ടമായി പൂവിട്ടുനിൽക്കുന്ന ജക്കറാന്ത മരങ്ങൾ കാണാൻ മുടങ്ങാതെ എത്തുന്ന സഞ്ചാരികളുമുണ്ട്.

ജക്കറാന്ത മിമിസിഫോളിയ എന്ന ശാസ്ത്രനാമമുളള ഈ പൂമരം സ്പാത്തോഡിയ കുടുംബാംഗം തന്നെയാണ്. ബ്രീട്ടീഷുകാർ ഹൈറേഞ്ചിന്റെ മണ്ണിൽ തേയില പാകിയതിനൊപ്പം തണൽമരമായി ഈ നീലവാകയെയും മൂന്നാറിന്റെ മലമുകളുകളിലെത്തിച്ചിരുന്നു. കൊതുക് പടർത്തുന്ന രോ​ഗങ്ങളിൽ നിന്ന് രക്ഷനേടുന്നതിനാണ് കൊതുകിനെ തുരത്താൻ കഴിവുണ്ടെന്ന് വിശ്വസിക്കപ്പെടുന്ന ജക്കറാന്തകളെ മൂന്നാറിലെത്തിച്ചതെന്നും പഴമക്കാർ പറയാറുണ്ട്.

നീലാകാശത്തിന് താഴെ ജക്കറാന്തകൾ പൂത്തുലഞ്ഞുനിൽക്കുന്നത് കാണുമ്പോൾ ഒരു പ്രത്യേക ഭംഗി തന്നെയാണ്. വേനലവധി കാലത്ത് മൂന്നാറിലെത്തുന്ന സഞ്ചാരികളെ ഏറ്റവും കൂടുതൽ ആകർഷിക്കുന്നത് ഈ വയലറ്റ് വസന്തമാണ്. ഒരോരോ കാലത്തും വ്യത്യസ്തങ്ങളായ പൂമരങ്ങൾ മൂന്നാറിനെ സുന്ദരിയാക്കുമെങ്കിലും ഈ നീല വാകയ്ക്ക് ആരാധകർ ഏറെയാണ്.