ഒമാന്‍ റിയാലിന്റെ വിനിമയ നിരക്ക് ഉയര്‍ന്നു

മസ്‌കറ്റ്: തിങ്കളാഴ്ച ഒമാനിലെ വിനിമയ സ്ഥാപനങ്ങള്‍ ഒരു റിയാലിന് നല്‍കിയത് 225.80 രൂപ എന്ന നിരക്കില്‍. കറന്‍സി നിരക്കുകള്‍ കാണിക്കുന്ന അന്താരാഷ്ട്ര പോര്‍ട്ടലായ എക്‌സ് ഇ കറന്‍സി കണ്‍വെര്‍ട്ടര്‍ ഒരു റിയാലിന്റെ വിനിമയ നിരക്ക് 226 രൂപയിലധികമാണ് തിങ്കളാഴ്ച കാണിച്ചത്.

ഇന്നലെ ഒരു യുഎഇ ദിര്‍ഹത്തിന്റെ മൂല്യം 23.72 രൂപയായിരുന്നു. ഒരു ഖത്തര്‍ റിയാലിന് 23.58 രൂപ, ബഹ്‌റൈനി റിയാലിന് 231.16 രൂപ, കുവൈത്തി ദിനാറിന് 282.05 രൂപയുമാണ് നിരക്ക് രേഖപ്പെടുത്തിയത്. 23.22 രൂപയാണ് ഒരു സൗദി റിയാലിന്റെ മൂല്യം.

ഇന്ത്യന്‍ രൂപയുടെ മൂല്യം ഒരു ഡോളറിന് 87.29 രൂപ എന്ന എക്കാലത്തെയും വലിയ ഇടിവിലേക്ക് കൂപ്പുകുത്തിയതോടെയാണ് വിനിമയ നിരക്ക് ഉയര്‍ന്നത്. ഡോളറിനെതിരെ രൂപയുടെ മൂല്യം 87.14 വരെയെത്തി. അമേരിക്കന്‍ പ്രസിഡന്റ് ഡോണള്‍ഡ് ട്രംപ് താരിഫ് നയങ്ങള്‍ മാറ്റിയതോടെ യുഎസ് ഡോളറിന്റെ കുതിപ്പ് പ്രകടമാണ്.