ചാമ്പ്യൻസ് ട്രോഫി ടൂർണമെന്റ് : രോഹിത് ശർമ്മ പാക്കിസ്ഥാൻ സന്ദർശിച്ചേക്കും

ഡൽഹി: ഇന്ത്യൻ ക്രിക്കറ്റ് ടീം ക്യാപ്റ്റൻ രോഹിത് ശർമ്മ ചാമ്പ്യൻസ് ട്രോഫി ടൂർണമെന്റിന് മുന്നോടിയായി പാക്കിസ്ഥാൻ സന്ദർശിച്ചേക്കുമെന്ന് റിപ്പോർട്ട്.

ഐ.സി.സിയുടെ രീതി അനുസരിച്ച് ചാമ്പ്യൻസ് ട്രോഫിയിൽ പ​ങ്കെടുക്കുന്ന രാജ്യങ്ങളുടെ ക്യാപ്റ്റൻമാർ അതിഥേയ രാജ്യത്തുവെച്ച് വാർത്തസമ്മേളനം നടത്തുകയും ഫോട്ടോഷൂട്ടിൽ പ​ങ്കെടുക്കുകയും ചെയ്യും. ഇത്തരത്തിൽ വാർത്താസമ്മേളനത്തിനും ഫോട്ടോഷൂട്ടിനും വേണ്ടിയായിരിക്കും രോഹിത് പാക്കിസ്ഥാൻ സന്ദർശനം നടത്തുക.

ഇതാദ്യമായാണ് 1996ന് ശേഷം ഒരു ഐ.സി.സി ടൂർണമെന്റിന് പാക്കിസ്ഥാൻ ആതിഥേയത്വം വഹിക്കുന്നത്. എന്നാൽ, സുരക്ഷ മുൻനിർത്തി ഇന്ത്യയുടെ ചാമ്പ്യൻസ് ട്രോഫി മത്സരങ്ങൾ യു.എ.ഇയിലാണ് നടക്കുന്നത്. ഇന്ത്യ-പാക്കിസ്ഥാൻ മത്സരത്തിനുള്ള വേദിയായി യു.എ.ഇയെ തെരഞ്ഞെടുത്തുവെന്ന് പാക്കിസ്ഥാൻ ക്രിക്കറ്റ് കൺട്രോൾ ബോർഡ് അറിയിച്ചിരുന്നു.