കേന്ദ്രീകൃത പാചകവാതക ശൃംഖലയുമായി അബുദാബി

അബുദാബിയിൽ കേന്ദ്രീകൃത പാചകവാതക ശൃംഖല (പൈപ്പ് ഗ്യാസ്) സ്ഥാപിക്കുന്നു. സുരക്ഷ ശക്തമാക്കുന്നതിന്റെയും വിതരണം ഏകോപിപ്പിക്കുന്നതിന്റെയും ഭാഗമായി എമിറേറ്റിൽ ഘട്ടം ഘട്ടമായി ഗ്യാസ് സിലിണ്ടറുകൾക്ക് നിയന്ത്രണം ഏർപ്പെടുത്തും. ഫ്രീസോൺ ഉൾപ്പെടെ എല്ലാ മേഖലകളിലുമുള്ള താമസ, വാണിജ്യ കെട്ടിടങ്ങളിൽ കേന്ദ്രീകൃത പാചകവാതക പൈപ്പ് സ്ഥാപിച്ചാണ് നിയന്ത്രണം നടപ്പാക്കുക. ഇതിനു മുന്നോടിയായി എമിറേറ്റിൽ പാചകവാതക പൈപ്പ് ലൈൻ സ്ഥാപിക്കുന്ന ജോലികൾ അന്തിമ ഘട്ടത്തിലാണ്.

കെട്ടിടങ്ങളിലെ പാചകവാതക സുരക്ഷാ മാനദണ്ഡങ്ങൾ ഊർജിതമാക്കുന്നതിന് എല്ലാ കമ്പനികളും വ്യക്തികളും പദ്ധതിയുമായി സഹകരിക്കണമെന്ന് ഊർജ വിഭാഗം ചെയർമാൻ ഡോ. അബ്ദുല്ല ഹുമൈദ് അൽ ജർവാൻ പറഞ്ഞു. എമിറേറ്റിന്റെ സാമ്പത്തിക,നഗര വിപുലീകരണത്തിനൊപ്പം സുരക്ഷ ശക്തമാക്കി ജീവിത നിലവാരം ഉയർത്തുകയാണ് ലക്ഷ്യം.