ഹോളിവുഡ് നടൻ വാൽ കിൽമർ അന്തരിച്ചു

 പ്രശസ്തനായ ഹോളിവുഡ് നടൻ വാൽ കിൽമർ അന്തരിച്ചു. ചൊവ്വാഴ്ച ലോസ് ഏഞ്ചൽസില്‍ വച്ചാണ് 65-ാം വയസ്സിൽ നടന്‍ അന്തരിച്ചത്. ന്യുമോണിയയാണ് അദ്ദേഹത്തിന്റെ മരണകാരണമെന്ന് മകൾ മെഴ്‌സിഡസ് കിൽമർ അറിയിച്ചു. 2014-ൽ നടന് തൊണ്ടയിൽ കാൻസർ ബാധിച്ചതായി കണ്ടെത്തിയെങ്കിലും അത് സുഖം പ്രാപിച്ചിരുന്നു.

1991-ൽ ഒലിവർ സ്റ്റോണിന്റെ ‘ദി ഡോർസ്’ എന്ന സിനിമയിൽ ഗായകൻ മോറിസൺ എന്ന റോള്‍ ഇദ്ദേഹത്തിന്‍റെ കരിയറിലെ തന്നെ മികച്ച വേഷമായാണ് കരുതപ്പെടുന്നത്. ഒരു വർഷത്തോളം ഇതിഹാസ ഗായകനെ അനുകരിച്ച ശേഷമാണ് വാൽ കിൽമർ ഈ വേഷം ചെയ്തത് എന്നാണ് അന്ന് പുറത്തുവന്ന അണിയറക്കഥ.  1995-ലെ ‘ബാറ്റ്മാൻ ഫോറെവർ’ എന്ന സിനിമയിൽ മൈക്കൽ കീറ്റണിന് പകരക്കാരനായി കിൽമർ  ബാറ്റ്മാനായി എത്തി. എന്നാല്‍ ലെജന്‍ഡായ കോമിക് ഹീറോ വേഷത്തില്‍ വാലിന്‍റെ പ്രകടനം സമ്മിശ്ര അഭിപ്രായമാണ് ലഭിച്ചത്. പിന്നീട് 1997-ൽ പുറത്തിറങ്ങിയ ‘ബാറ്റ്മാൻ ആൻഡ് റോബിൻ’ എന്ന സിനിമയിൽ ജോർജ്ജ് ക്ലൂണിക്കായി ഈ വേഷം ഇദ്ദേഹം മാറി നല്‍കി.കാൻസർ കാരണം നടന് സംസാര ശേഷി നഷ്ടപ്പെട്ടിരുന്നു. പക്ഷേ 2021-ൽ ടോം ക്രൂയിസിന്റെ ‘ടോപ്പ് ഗൺ: മാവെറിക്ക്’ എന്ന സിനിമയിലൂടെ ഇദ്ദേഹം തിരിച്ചെത്തുകയായിരുന്നു.