എമ്പുരാന്‍ നിശ്ചയിച്ച ദിവസം തന്നെ തിയേറ്ററുകളില്‍ എത്തും; നിർണായക ഇടപെടലുമായി ഗോകുലം മൂവീസ്

മലയാളി സിനിമാപ്രേമികള്‍ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളില്‍ ഒന്നാണ് എമ്പുരാന്‍. ഏറ്റവും വലിയ കാന്‍വാസില്‍ ഒരുങ്ങിയ എമ്പുരാന്റെ വരാനിരിക്കുന്ന റിലീസുമായി ബന്ധപ്പെട്ടുണ്ടായ പ്രശ്‌നങ്ങള്‍ പരിഹരിച്ചു. ചിത്രത്തിന്റെ നിര്‍മാണ പങ്കാളിയായ ലൈക്കയില്‍ നിന്ന് റൈറ്റ്സുകള്‍ പ്രമുഖ നിര്‍മാണ കമ്പനിയായ ഗോകുലം മൂവിസ് ഏറ്റെടുത്തു. ലൈക്കയുമായുള്ള പ്രശ്‌നങ്ങള്‍ക്ക് പിന്നാലെ എമ്പുരാന്റെ റീലീസ് പ്രതിസന്ധിയിലായിരുന്നു. ഈ അവസരത്തിലാണ് ഗോകുലം ഗോപാലന്റെ ഇടപെടല്‍. പ്രശ്‌നങ്ങള്‍ക്ക് പരിഹാരമായതോടെ എമ്പുരാന്‍ നിശ്ചയിച്ച ദിവസം തന്നെ തിയേറ്ററുകളില്‍ എത്തും.കേരളത്തില്‍ ആശിര്‍വാദ് തന്നെ ചിത്രം തിയറ്ററുകളിലെത്തിക്കും.

ആശിര്‍വാദിനൊപ്പം സഹനിര്‍മാതാക്കളായ ലൈക്ക പ്രൊഡക്ഷന്‍സ് ചിത്രത്തിന്റെ നിന്ന് പിന്‍വാങ്ങിയതില്‍ വന്ന ആശയക്കുഴപ്പത്തെത്തുടര്‍ന്ന് ചിത്രത്തിന്റെ പ്രൊമോഷണല്‍ മെറ്റീരിയലുകളടക്കം പുറത്തെത്തിക്കുന്നതില്‍ മുടക്കം വന്നിരുന്നു. കേരളത്തിന് പുറത്ത് ലൈക്ക പ്രൊഡക്ഷന്‍സും കേരളത്തില്‍ ആശിര്‍വാദും വിതരണം ചെയ്യുമെന്നായിരുന്നു നേരത്തെ ഉണ്ടായിരുന്ന കരാര്‍. ലൈക്ക പ്രൊഡക്ഷന്‍ പിന്‍മാറിയതോടെ ഗോകുലം ഗോപാലന്റെ ശ്രീ ഗോകുലം മൂവീസ് എമ്പുരാന്റെ വിതരണം ഏറ്റെടുത്തു. സമീപകാലത്ത് ലൈക്ക പ്രൊഡക്ഷന്‍സ് നിര്‍മ്മിച്ച വന്‍ ചിത്രങ്ങള്‍ പലതും പരാജയമായിരുന്നു. ഇതില്‍ തിയേറ്റര്‍ ഉടമകളുമായി സാമ്പതിക തര്‍ക്കവും നിലനിന്നിരുന്നു. ഇക്കാരണങ്ങള്‍കൊണ്ടെല്ലാമാണ് ലൈക്ക പിന്‍മാറിയതെന്നാണ് വിവരം