ഇന്ത്യ എന്ന രാജ്യത്തെ കുറിച്ച് കേട്ടിട്ടു പോലുമില്ലാത്ത ഒരു ടാക്സി ഡ്രൈവർ

ഇന്ത്യ എന്ന രാജ്യത്തെ കുറിച്ച് കേട്ടിട്ടു പോലുമില്ലാത്ത ഒരു ടാക്സി ഡ്രൈവർ. ദക്ഷിണ കൊറിയയിലെ ഒരു ടാക്സി ഡ്രൈവറാണ് ഇന്ത്യ എന്നൊരു രാജ്യത്തെ കുറിച്ച് ഇതുവരെയും കേട്ടിട്ടുപോലും ഇല്ലാത്തത്. ഫാഷൻ, ബ്യൂട്ടി കണ്ടന്റ് ക്രിയേറ്ററായ പിയൂഷ പാട്ടീലാണ് ഈ ഡ്രൈവറുമായുള്ള സംഭാഷണം സമൂഹ മാധ്യമങ്ങളിൽ പങ്കുവെച്ചത്. ഈ സംഭാഷണം ഇപ്പോൾ സൈബറിടങ്ങളിൽ വൈറലാണ്.

ദക്ഷിണ കൊറിയയിലെ സിയോളിലാണ് പിയൂഷ പാട്ടീൽ താമസിക്കുന്നത്. മുമ്പും ഇവിടുത്തെ ടാക്സികളിൽ സ‍ഞ്ചരിക്കുന്ന വേളയിൽ വിചിത്രമായ സംഭാഷണങ്ങൾ ഡ‍്രൈവർമാരിൽ നിന്നും ഉണ്ടായിട്ടുണ്ട്. ഇതോടെയാണ് ഇക്കുറി ടാക്സി ഡ്രൈവറുടെ സംഭാഷണം റെക്കോഡ് ചെയ്യാമെന്ന് യുവതി തീരുമാനിച്ചത്. താൻ ഇന്ത്യയിൽ നിന്നാണ് വരുന്നത് എന്ന് വിശ്വസിക്കാൻ കൊറിയയിലെ ഈ ടാക്സി ഡ്രൈവർ തയ്യാറായില്ല എന്നാണ് യുവതി പറയുന്നത്.

യാത്രയ്ക്കിടെ ഡ്രൈവർ വിചിത്രമായ പല ചോദ്യങ്ങളും ചോദിച്ചു കൊണ്ടിരിക്കുകയായിരുന്നു എന്നാണ് യുവതി വെളിപ്പെടുത്തുന്നത്. പീയൂഷയോട് എവിടെ നിന്നാണ് വരുന്നത് എന്ന് ടാക്സി ഡ്രൈവർ ചോദിക്കുന്നതോടെയാണ് സംഭാഷണം തുടങ്ങുന്നത്. ഇന്ത്യ എന്ന് യുവതി മറുപടി നൽകുന്നുണ്ട്. പാകിസ്ഥാനും ചൈനയ്ക്കും സമീപമാണ് ഇന്ത്യ സ്ഥിതി ചെയ്യുന്നത് എന്നും യുവതി പറയുന്നുണ്ട്.

അയാൾ തിരിച്ച് ചോദിക്കുന്നത് ‘ഇന്തോനേഷ്യ ആണോ’ എന്നാണ്. യുവതിയെ തിരുത്താനാണ് അയാൾ ശ്രമിക്കുന്നത്. എന്നാൽ, പീയൂഷ വീണ്ടും ‘ഇന്ത്യ’ എന്ന് ആവർത്തിക്കുന്നു. ‘ഇന്ത്യ എന്നൊരു രാജ്യമുണ്ട്? അവിടെ ജനസംഖ്യ എത്രയാണ്’ എന്നാണ് പിന്നീടയാൾ ചോദിക്കുന്നത്. ലോകത്തിലെ ഏറ്റവും കൂടുതൽ ജനസംഖ്യയുള്ള രാജ്യമാണ് ഇന്ത്യ, ചൈനയേക്കാൾ ജനങ്ങൾ ഇന്ത്യയിലുണ്ട് എന്നും പീയൂഷ പറയുന്നുണ്ട്.

അയാൾക്ക് അത് വിശ്വസിക്കാൻ തന്നെ പ്രയാസമായിരുന്നു. ചൈനയിൽ 1.3 ബില്ല്യൺ ആളുകളുണ്ട് എന്നാണ് അയാൾ പറയുന്നത്. എന്നാൽ, ചൈനയിലേക്കാൾ ജനസംഖ്യ ഇന്ത്യയിലാണ് എന്ന് പീയൂഷ പറയുന്നു. ഒടുവിൽ പീയൂഷ പറഞ്ഞ രാജ്യം മനസിലായ മട്ടിൽ, ‘ഓ, എന്നാലത് ഇന്ത്യയായിരിക്കും’ എന്നും ഡ്രൈവർ പറയുന്നത് കേൾക്കാം.