അന്തർ സംസ്ഥാന മോഷ്ടാവ് പിടിയിൽ

പത്തനാപുരം: പിറവന്തൂരിലെ മൂന്ന് വീടുകളിലടക്കം പൂട്ടിക്കിടക്കുന്ന വീടുകൾ കേന്ദ്രീകരിച്ച് മോഷണം നടത്തിവന്ന അന്തർ സംസ്ഥാന മോഷ്ടാവ് പിടിയിൽ.കുന്നിക്കോട് വിളക്കുടി ധർമ്മപുരി ഷീജ ഭവനിൽ ഷിബുവാണ് (33) അറസ്റ്റിലായത്.

ഷിജു, സുജിത്ത് എന്നീ പേരുകളിലും അറിയപ്പെടുന്ന പ്രതി കേരളത്തിലെ വിവിധ ജില്ലകൾക്ക് പുറമേ തമിഴ്നാട്, ആന്ധ്രാപ്രദേശ് എന്നീ സംസ്ഥാനങ്ങളിലും നൂറിലേറെ മോഷണം നടത്തിയിട്ടുണ്ട്. കേസുകളിൽ ശിക്ഷയും അനുഭവിച്ചിട്ടുണ്ട്.ഇളമ്പൽ പാപ്പാരംകോട് വച്ചാണ് പൊലീസ് പ്രതിയെ പിടികൂടിയത്.

ഈ സമയം ഷിബുവിനൊപ്പമുണ്ടായിരുന്ന സനോജ് ഓടി രക്ഷപ്പെട്ടു.ആന്ധ്രാപ്രദേശിലെ തുരുപ്പതിയിൽ നടന്ന മോഷണക്കേസിൽ ഷിബു അറസ്റ്റിലായിരുന്നു. ഡിസംബറിൽ ജയിലിൽ നിന്നിറങ്ങിയ ശേഷമാണ് ഇപ്പോൾ വീണ്ടും പിടിയിലായത്.

മോഷണ വസ്തുക്കൾ വിൽക്കാൻ സാഹായിച്ചിരുന്ന ആളാണ് സനോജ്. പൊലീസ് എത്തിയതറിഞ്ഞ് അക്രമാസക്തനായ ഷിബു ബ്ലേഡും മറ്റ് ആയുധങ്ങളും ഉപയോഗിച്ച് പൊലീസ് സംഘത്തെ ആക്രമിച്ചു. ഏറെ പണിപ്പെട്ടാണ് പൊലീസ് പ്രതിയെ കീഴ്പ്പെടുത്തിയത്.