വൈദ്യുത വാഹനങ്ങളുടെ വില്‍പന; ആദ്യ പത്തിൽ ഇടം നേടി കേരളം

വൈദ്യുത ഇരുചക്ര വാഹനങ്ങളുടെ വില്‍പനയിലും വൈദ്യുത കാര്‍ വില്‍പനയിലും രാജ്യത്തെ മറ്റ് സംസ്ഥാനങ്ങളെ മറികടന്ന് ആദ്യപത്തില്‍ ഇടം നേടി കേരളം. മഹാരാഷ്ട്രയും കര്‍ണാടകയുമാണ് വൈദ്യുത ഇരുചക്ര വാഹനങ്ങളുടേയും വൈദ്യുത കാറുകളുടേയും വില്‍പനയില്‍ ആദ്യ രണ്ടു സ്ഥാനങ്ങളിലെത്തിയിരിക്കുന്നത്. 2024ലെ വൈദ്യുത കാറുകളുടെ വില്‍പനയില്‍ മൂന്നാം സ്ഥാനവും വൈദ്യുത ഇരുചക്ര വാഹനങ്ങളുടെ വില്‍പനയില്‍ ആറാം സ്ഥാനവും കേരളം സ്വന്തമാക്കി.

രാജ്യത്തിന്റെ സാമ്പത്തിക തലസ്ഥാനമായി അറിയപ്പെടുന്ന മുംബൈ ഉള്‍പ്പെടുന്ന മഹാരാഷ്ട്രയാണ് വൈദ്യുത ഇരുചക്രവാഹന വില്‍പനയില്‍ ഒന്നാമതുള്ളത്. 2,10,174 വൈദ്യുത ഇരുചക്രവാഹനങ്ങളാണ് 2024ല്‍ മഹാരാഷ്ട്രയില്‍ വിറ്റത്. നിരവധി വാഹന നിര്‍മാണ കമ്പനികളുടെ ആസ്ഥാനവും മഹാരാഷ്ട്രയിലാണ്. രണ്ടാം സ്ഥാനത്തുള്ള കര്‍ണാടകയില്‍ 2024ല്‍ 1,55,454 വൈദ്യുത ഇരുചക്രവാഹനങ്ങള്‍ വിറ്റു. മൂന്നാം സ്ഥാനത്തുള്ള തമിഴ്‌നാട് 1,14,762 വില്‍പന പൂര്‍ത്തിയാക്കി. ഉത്തര്‍പ്രദേശ്(95,513), രാജസ്ഥാന്‍(76,821) എന്നീ സംസ്ഥാനങ്ങള്‍ യഥാക്രമം നാല്, അഞ്ച് സ്ഥാനങ്ങള്‍ നേടി. 66,854 വൈദ്യുത സ്‌കൂട്ടറുകള്‍ വിറ്റാണ് കേരളം ആറാം സ്ഥാനം നേടിയിരിക്കുന്നത്.

മധ്യപ്രദേശ്(65,814), ഗുജറാത്ത്(65,081), ഒഡീഷ(56,306), ഡല്‍ഹി(31,536), ആന്ധ്രപ്രദേശ്(48,761) എന്നിങ്ങനെയുള്ള സംസ്ഥാനങ്ങളെ കേരളം മറികടന്നിട്ടുണ്ട്. മഹാരാഷ്ട്രയും കര്‍ണാടകയും തന്നെയാണ് കഴിഞ്ഞ വര്‍ഷം വൈദ്യുത കാര്‍ വില്‍പനയിലും മുന്നിലെത്തിയത്. 10,982 വൈദ്യുത കാറുകള്‍ വിറ്റാണ് കേരളം രാജ്യത്ത് മൂന്നാം സ്ഥാനത്തെത്തിയിരിക്കുന്നത്. രാജ്യത്തെ തന്നെ പ്രധാന വൈദ്യുത വാഹന വിപണിയായി കേരളം മാറിയെന്നു തെളിയിക്കുന്നതാണ് കണക്കുകള്‍. വൈദ്യുത കാര്‍ വില്‍പനയില്‍ തമിഴ്‌നാട്(7,770), ഉത്തര്‍പ്രദേശ്(6,781), ഡല്‍ഹി(6,527), ഗുജറാത്ത്(6,266), രാജസ്ഥാന്‍(6,130), ആന്ധ്രപ്രദേശ്(4,079), ഹരിയാന(3,880) എന്നീ സംസ്ഥാനങ്ങളാണ് നാലു മുതല്‍ പത്തു വരെയുള്ള സ്ഥാനങ്ങളിലുള്ളത്