ലവ് ടുഡേയുടെ ഹിന്ദി റീമെയ്ക്ക് ; ട്രെയിലർ പുറത്ത്

2022ൽ തമിഴിൽ വിജയം കൊയ്‌ത പ്രദീപ് രംഗനാഥന്‍ സംവിധാനം ചെയ്ത ചിത്രമായിരുന്നു ലവ് ടുഡേ. പ്രദീപ് രംഗനാഥന്‍ തന്നെ നായകനായി എത്തിയ സിനിമ മികച്ച പ്രേക്ഷക പ്രതികരണങ്ങള്‍ക്കൊപ്പം വലിയ ബോക്‌സ് ഓഫീസ് കളക്ഷനും നേടിയിരുന്നു. ഇപ്പോഴിതാ ചിത്രത്തിന്റെ ഹിന്ദി റീമേക്കിന്റെ ട്രെയ്ലര്‍ പുറത്തുവന്നിരിക്കുകയാണ്. ലൗയാപ് എന്ന് പേരിട്ടിരിക്കുന്ന ചിത്രത്തില്‍ പ്രധാന വേഷങ്ങളില്‍ എത്തുന്നത് ജുനൈദ് ഖാനും ഖുഷി കപൂറുമാണ്. ലവ് ടുഡേ നിര്‍മ്മാതാക്കളായ എജിഎസ് എന്റര്‍ടെയ്‌മെന്റ് ചിത്രത്തിലെ നിര്‍മ്മാണ പങ്കാളികളാണ്.

തമിഴില്‍ സത്യരാജ് ചെയ്ത പിതാവിന്റെ വേഷം ഹിന്ദിയില്‍ അശുതോഷ് റാണയാണ് ചെയ്യുന്നത്. അദ്വേത് ചന്ദന്‍ ആണ് ലൗയാപ് സംവിധാനം ചെയ്യുന്നത്. 2025 ഫെബ്രുവരി 7 നാണ് ചിത്രം റിലീസ് ചെയ്യുന്നത്. ജുനൈദ് ഖാന്റെയും ഖുഷിയുടെയും ആദ്യത്തെ തീയറ്റര്‍ റിലീസായി മാറുകയാണ് ചിത്രം.