ലോട്ടറി ടിക്കറ്റുകളുടെ വില വർധിപ്പിച്ചു; സമ്മാന തുകയിലും മാറ്റം

തിരുവനന്തപുരം: കേരള സംസ്ഥാന ലോട്ടറി വകുപ്പ് ലോട്ടറി ടിക്കറ്റുകളുടെ വില വർധിപ്പിച്ചു. പ്രതിവാര ടിക്കറ്റുകളുടെ വിലയിലാണ് വർധനവുണ്ടായിരിക്കുന്നത്. ഇതോടെ 40 രൂപയുടെ ടിക്കറ്റുകൾക്ക് 50 രൂപയാകും. മൂന്ന് പ്രതിവാര ടിക്കറ്റുകളുടെ വില വർധിപ്പിച്ച് വിജ്ഞാപനം പുറത്തിറക്കി. മറ്റു ടിക്കറ്റുകൾക്കും ഉടൻ വിലകൂടും എന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.

പുതിയ നിരക്ക് പ്രാബല്യത്തിൽവരുന്നതോടെ ആഴ്ചയിൽ ഏഴ് ദിവസവുമുള്ള എല്ലാ ഭാഗ്യക്കുറികളുടെയും ടിക്കറ്റ് നിരക്ക് 50 രൂപയായി ഉയരും. നിലവിൽ ഫിഫ്റ്റി- 50 ഭാഗ്യക്കുറിക്ക് മാത്രമാണ് 50 രൂപ നിരക്കുള്ളത്. ടിക്കറ്റ് നിരക്ക് വർധനവിനൊപ്പം സമ്മാനത്തുകകളിലും വർദ്ധന വരുത്തിയിട്ടുണ്ട്. 75 മുതൽ 80 ലക്ഷംവരെയായിരുന്ന ഒന്നാം സമ്മാനം ഒരുകോടി രൂപയായി ഉയർത്തി. ചൊവ്വാഴ്ച നറുക്കെടുക്കുന്ന സ്ത്രീശക്തി ലോട്ടറിയുടെ 75 ലക്ഷം രൂപ സമ്മാനം ഒരുകോടിയായി ഉയരും. വ്യാഴാഴ്ചത്തെ കാരുണ്യ പ്ലസ് സമ്മാനവും 80 ലക്ഷം രൂപയിൽ നിന്ന് ഒരു കോടിയാകും.