‘എ.എം.എം.എ’ വേണ്ട, ‘അമ്മ’ എന്ന പേര് അങ്ങനെ തന്നെ വേണം

കൊച്ചി: താരസംഘടനയ്ക്ക് ‘അമ്മ’ എന്ന പേര് തന്നെ വേണമെന്നും ‘എ.എം.എം.എ’ എന്ന് വേണ്ടെന്നും നടനും കേന്ദ്ര സഹമന്ത്രിയുമായ സുരേഷ് ഗോപി. മലയാള സിനിമയുടെ സംഘടനയ്ക്ക് ‘അമ്മ’ എന്ന പേര് നല്‍കിയത് അന്തരിച്ച നടന്‍ മുരളിയാണെന്നും അതങ്ങനെ തന്നെ വേണമെന്നും അദ്ദേഹം പറഞ്ഞു. കൊച്ചിയില്‍ നടന്ന ‘അമ്മ’ കുടുംബ സംഗമം വേദിയില്‍ ആയിരുന്നു സുരേഷ് ഗോപിയുടെ പ്രതികരണം. സംഘടനയ്ക്കെതിരെ വിവാദങ്ങൾ ഉയർന്ന പശ്ചാത്തലത്തിൽ പലരും ‘എ.എം.എം.എ’ എന്ന് പറഞ്ഞിരുന്നത് ശ്രദ്ധിക്കപ്പെട്ടിരുന്നു. ഇതിനെ തുടർന്നായിരുന്നു നടന്റെ മറുപടി. ‘അമ്മ എന്ന പേര് സംഘടനയ്ക്ക് നല്‍കിയത് സ്വര്‍ഗീയനായ ശ്രീ മുരളിയാണ്. നമ്മുടെ ഒക്കെ മുരളി ചേട്ടന്‍. അതങ്ങനെ തന്നെയാണ് ഉച്ചരിക്കപ്പെടേണ്ടത്. പുറത്തുള്ള മുതലാളിമാര്‍ പറയുന്നത് നമ്മള്‍ അനുസരിക്കില്ല. എ കുത്ത് എം കുത്ത് എം കുത്ത് എ കുത്ത് അതവരുടെ വീട്ടില്‍ കൊണ്ട് വച്ചാല്‍ മതി. ഞങ്ങള്‍ക്ക് അമ്മയാണ്’, എന്നായിരുന്നു അദ്ദേഹം പറഞ്ഞത്.