ട്രെയിൻ വന്നത് അറിഞ്ഞില്ല; ഹെഡ്സെറ്റ് വെച്ച് പബ്ജി കളിച്ച മൂന്ന് കുട്ടികൾക്ക് ദാരുണാന്ത്യം

പട്ന: ട്രെയിൻ ഇടിച്ച് മൂന്ന് കുട്ടികൾക്ക് ദാരുണാന്ത്യം.ബിഹാറിലെ വെസ്റ്റ് ചമ്പാരൻ ജില്ലയിൽ റെയിൽവേ ട്രാക്കിലിരുന്ന് പബ്ജി കളിച്ച കുട്ടികളെയാണ് ട്രെയിൻ ഇടിച്ചത്. നർഗാതിഗഞ്ച്-മുസാഫർപൂർ റെയിൽവേ സെക്ഷനിൽ മാൻസയിലെ റോയൽ സ്കൂളിന് സമീപമാണ് സംഭവം. ഫുക്റാൻ അലം, മനീഷ് തോള, സമീർ അലം എന്നിവരാണ് മരിച്ചത്.

ഇയർഫോൺ ഉപയോഗിച്ചാണ് മൂന്ന് കുട്ടികളും ഗെയിം കളിച്ചിരുന്നത്. ഇത് മൂലം ട്രെയിൻ വരുന്നത് ഇവർ അറിഞ്ഞിരുന്നില്ലെന്നാണ് നിഗമനം. ഇതാണ് വലിയ ദുരന്തത്തിന് കാരണമായത്. പോസ്റ്റ്മോർട്ടത്തിന് ശേഷം കുട്ടികളുടെ മൃതദേഹങ്ങൾ സംസ്കരിക്കാനായി കുടുംബാംഗങ്ങൾ സ്വന്തം ഗ്രാമങ്ങളിലേക്ക് കൊണ്ടു പോയി. അപകടത്തിന് പിന്നാലെ റെയിൽവേ പൊലീസിലെ സദർ സബ് ഡിവിഷണൽ പൊലീസ് ഓഫീസർ വിവേക് ദീപ് സംഭവസ്ഥലം സന്ദർശിച്ചു. അപകടത്തെ സംബന്ധിച്ച് റെയിൽവേ അധികൃതർ അന്വേഷണം ആരംഭിച്ചു.