ചൈനയിൽ വാടകയ്ക്ക് നൽകിയ ഫ്ലാറ്റ് കോഴിഫാമാക്കി; വാടകക്കാരനെതിരെ പരാതിയുമായി ഉടമ

വാടയ്ക്ക് താമസിക്കാനെന്ന വ്യാജേന ഒരാൾ ഫ്ലാറ്റ് വാങ്ങുന്നു. എന്നാൽ നടക്കുന്നതാവട്ടെ മറ്റൊന്നും. വാടകയ്‌ക്കെടുത്ത ഫ്ലാറ്റിൽ താമസിക്കുന്നതിന് പകരമായി അയാൾ ചെയ്യുന്നത് അവിടെ കോഴികളെ വളർത്തുകയും ആ ഫ്ലാറ്റ് ഒരു കോഴിഫാമാക്കി മാറ്റുകയുമാണ്. സംഭവം നടക്കുന്നത് ചൈനയിലെ ഷാങ്ഹായിലാണ്. താൻ വാടകയ്ക്കായി നൽകിയ ഫ്ലാറ്റ് സന്ദർശിക്കാനെത്തിയ ഉടമ തന്റെ വീടിന്റെ അവസ്ഥ കണ്ട് ഞെട്ടിപ്പോയെന്ന് മാധ്യമങ്ങളോട് പറഞ്ഞു. തന്റെ വീട് നശിപ്പിച്ച വാടക്കാരനെതിരെ ഇപ്പോൾ ഉടമ പരാതിയും നൽകിയിട്ടുണ്ട്.

കഴിഞ്ഞ രണ്ട് വർഷക്കാലമായി വടകയ്ക്ക് നല്‍കിയ വീട്, അദ്ദേഹം സന്ദര്‍ശിച്ചിരുന്നില്ല. ഈ സമയത്ത് വീട് മറ്റൊരാൾക്ക് വാടകയ്ക്ക് നല്‍കിയിരിക്കുകയായിരുന്നു. അയാളാണ് ഫ്ലാറ്റിലെ മുറികളില്‍ കോഴികളെ വളര്‍ത്തി അതൊരു കോഴി ഫാമാക്കി മാറ്റിയത്. ഒടുവില്‍, കഴിഞ്ഞ ദിവസം വീട്ടിലെത്തിയ താന്‍ അതിനുള്ളിലെ കാഴ്ച കണ്ട് തകർന്ന് പോയെന്നാണ് മാധ്യമങ്ങളോട് പറഞ്ഞത്.

വീടിന്‍റെ സിറ്റിംഗ് റൂം മുഴുവൻ കോഴികളെ കൊണ്ട് നിറഞ്ഞിരുന്നു. അവയുടെ തൂവലും കാഷ്ടവും മുറിയിലാകെ നിറഞ്ഞ് കിടന്നു. കടുത്ത ദുർഗന്ധം വമിക്കുന്ന അവസ്ഥയാലായിരുന്നു വീടെന്നും ഇദ്ദേഹം പറയുന്നു. വീടിന്‍റെ തറയും ഭിത്തിയും പൂർണ്ണമായും നശിച്ചു പോയെന്നും മേലിൽ ആ വീട്ടിൽ ആർക്കും താമസിക്കാൻ പറ്റാത്ത അവസ്ഥയാണ് ഉള്ളതെന്നും അദ്ദേഹം വ്യക്തമാക്കി. വീട് പൂർണമായി നവീകരിച്ചാൽ അല്ലാതെ ഇനിയത് ആർക്കും ഉപയോഗിക്കാൻ ആവില്ലെന്നും അദ്ദേഹം കൂട്ടിച്ചേർത്തു. നവീകരണ പ്രവർത്തികൾക്ക് മാത്രമായി തനിക്ക് ഇതുവരെയും ലഭിച്ച വാടകയുടെ ഇരട്ടി ചെലവാകുമെന്നും അദ്ദേഹം പറഞ്ഞു.

ഫ്ലാറ്റിൽ നിന്നും കടുത്ത ദുർഘന്ധം വമിക്കുന്നുണ്ടെന്ന് അയൽക്കാരൻ അറിയിച്ചതിനെത്തുടർന്നാണ് ഉടമ ഫ്ലാറ്റിൽ എത്തിച്ചേരുന്നത്. എന്നാൽ എത്തിയപ്പോൾ കണ്ട കാഴ്ച അയാളെ ഞെട്ടിച്ചു. തന്റെ വീട് ഇത്രയും വൃത്തികേടാക്കുകയും തന്നോട് വിശ്വാസ വഞ്ചന കാണിക്കുകയും ചെയ്ത വാടകക്കാരനോട് എങ്ങനെയാണ് താൻ പ്രതികരിക്കേണ്ടതെന്ന് സാമൂഹിക മാധ്യമങ്ങളിലൂടെ അഭിപ്രായം ചോദിക്കുകയാണ് ഫ്ലാറ്റുടമ. വീട് വാങ്ങിച്ച ഉദ്ദേശത്തില്‍ നിന്നും മാറിയതിനാല്‍ ഉടമയ്ക്ക് പാട്ടക്കരാർ അവസാനിപ്പിക്കാമെന്ന് ചൈനയുടെ സിവിൽ കോഡ് വ്യവസ്ഥ ചെയ്യുന്നുണ്ടെന്ന് സംഭവത്തിൽ പ്രതികരിച്ച ജിലിൻ സുബാംഗ് എന്ന നിയമ സ്ഥാപനത്തിലെ അഭിഭാഷകനായ ഷാങ് യിംഗ് പറഞ്ഞു.