കലൂര്‍ സ്റ്റേഡിയം അപകടം; മൃദം​ഗ വിഷൻ ഡയറക്ടർ പോലീസിൽ കീഴടങ്ങി

കൊച്ചി: കലൂര്‍ സ്റ്റേഡിയത്തിലെ നൃത്ത പരിപാടിക്കിടെ വീണ് ഉമ തോമസ് എം.എല്‍.എയ്ക്ക് ഗുരുതര പരിക്കേറ്റ സംഭവത്തില്‍ പോലീസിൽ കീഴടങ്ങി മൃദംഗ വിഷന്‍ ഡയറക്ടര്‍ നിഗോഷ് കുമാര്‍. നിഗോഷ് കുമാറാണ് എല്ലാ കാര്യങ്ങളും നിയന്ത്രിക്കുന്നതെന്ന് നേരത്തെ പോലീസ് അറസ്റ്റ് ചെയ്ത മൃദംഗ വിഷന്‍ സി.ഇ.ഒ.ഷമീര്‍ അബ്ദുള്‍ റഹീം പോലീസിന് മൊഴി നല്‍കിയിരുന്നു. ഉച്ചയ്ക്ക് രണ്ട് മണിക്ക് പാലാരിവട്ടം പോലീസിന് മുമ്പാകെ ഹാജരാകണമെന്നാണ് നിഗോഷ് കുമാറിന് ഹൈക്കോടതി കഴിഞ്ഞ ദിവസം നിര്‍ദേശം നല്‍കിയിരുന്നത്. എത്തിയില്ലെങ്കില്‍ അറസ്റ്റ് ചെയ്യാനും കോടതി നിര്‍ദേശം നല്‍കിയിരുന്നു. നികോഷ് കുമാറും ഓസ്‌കാര്‍ ഇവന്റ്സ് ഉടമ ജനീഷ് കുമാറും ഹൈക്കോടതിയില്‍ നല്‍കിയ മുന്‍കൂര്‍ ജാമ്യാപേക്ഷയിലായിരുന്നു നിര്‍ദേശം. ഷമീര്‍ അബ്ദുള്‍ റഹീം, ഇവന്റ് മാനേജ്മെന്റ് കമ്പനി ഡയറക്ടര്‍ കൃഷ്ണകുമാര്‍, ബെന്നി എന്നിവരെ നേരത്തേ പോലീസ് പ്രതി ചേര്‍ത്തിരുന്നു.