എട്ടു വയസുകാരിക്ക് നേരെ ലൈംഗികാതിക്രമം: അമ്പത്തഞ്ചുകാരന് 15 വർഷം കഠിനതടവ്

ചെറുതോണി: സ്കൂളിൽ നിന്നും മടങ്ങിവരുന്ന വഴിയിൽ എട്ടു വയസുകാരിയോട് ലൈംഗികാതിക്രമം കാട്ടിയ കേസിൽ അമ്പത്തഞ്ചുകാരന് 15 വർഷം കഠിന തടവും 1,76,000 രൂപ പിഴയും ശിക്ഷ ലഭിച്ചു. കുമളി ചെങ്കര സ്വദേശി കുരിശുമല ഭാഗത്ത് രാജേഷ് ഭവൻ വീട്ടിൽ മാരിമുത്തു ആറുമുഖനെ (55) യാണ് കോടതി ശിക്ഷിച്ചത്.

ഇടുക്കി പൈനാവ് അതിവേഗ കോടതി ജഡ്‌ജ് ലൈജുമോൾ ഷെരീഫാണ് ശിക്ഷ വിധിച്ചത്. 2023 ജൂലൈ മാസമാണ് കേസിനാസ്‌പദമായ സംഭവം. സ്കൂൾ വിട്ട് വീട്ടിലേക്ക് ഒറ്റയ്ക്ക് വരുംവഴി ബാലികയോട് ആൾസാന്നിധ്യമില്ലാതിരുന്ന ക്ഷേത്രപരിസരത്തുവച്ച് ലൈംഗികാതിക്രമം നടത്തിയെന്നാണ് പ്രൊസീക്യൂഷൻ കേസ്. 13 സാക്ഷികളെയും 17 പ്രമാണങ്ങളും പ്രൊസീക്യൂഷൻ കോടതിയിൽ ഹാജരാക്കി. പിഴ ഒടുക്കാത്ത പക്ഷം പ്രതി അധിക ശിക്ഷ അനുഭവിക്കണം. പ്രതിയിൽനിന്ന് ഈടാക്കുന്ന പിഴത്തുകയും കൂടാതെ ജില്ലാ ലീഗൽ സർവീസസ് അതോറിറ്റിയോട് മതിയായ നഷ്‌പരിഹാരവും അതിക്രമത്തിനിരയായ കുട്ടിക്ക് നൽകാനും കോടതി വിധിച്ചു.