പുതുവർഷത്തിൽ പുത്തൻ ഭാവത്തിൽ വൺപ്ലസ് എത്തുന്നു; 13സിരീസ് ജനുവരി ഏഴിന് വിപണിയിൽ എത്തും

ഡൽഹി: പുതുവർഷത്തിൽ പുത്തൻ ഫോൺ അവതരിപ്പിക്കാനൊരുങ്ങി വണ്‍പ്ലസ്. വൺപ്ലസിന്റെ 13 സിരീസ് 2025 ജനുവരി ഏഴാം തിയതി ആഗോളതലത്തില്‍ പുറത്തിറങ്ങും. വണ്‍പ്ലസ് 13, വണ്‍പ്ലസ് 13ആര്‍ എന്നീ രണ്ട് ഹാന്‍ഡ്‌സെറ്റുകളാണ് ഈ സിരീസിലുള്ളത്.

അതേസമയം ലോഞ്ചിന് മുന്നോടിയായി ഇന്ത്യയടക്കമുള്ള രാജ്യങ്ങളിൽ വണ്‍പ്ലസ് 13ന്‍റെ വില വിവരം ചോര്‍ന്നതായാണ് വിവരം.
ഇന്ത്യയിൽ വണ്‍പ്ലസ് 13ന്‍റെ വില 67,000ത്തിനും 70,000ത്തിനും ഇടയിലായിരിക്കുമെന്ന വിവരമാണ് ചോർന്നത്. രണ്ട് റാമുകളിലും സ്റ്റോറേജുകളിലുമുള്ള വേരിയന്‍റുകള്‍ വണ്‍പ്ലസ് 13നുണ്ടാകും. മുന്‍ഗാമിയായ വണ്‍പ്ലസ് 12ന്‍റെ 12 ജിബി + 256 ജിബി വേരിയന്‍റിന് 64,999 രൂപയും 16 ജിബി + 512 ജിബി വേരിയന്‍റിന് 69,999 രൂപയുമായിരുന്നു വില.

ഒരൊറ്റ റാം, സ്റ്റോറേജ് കോണ്‍ഫിഗറേഷനോടെയാവും വണ്‍പ്ലസ് 13ആര്‍ പുറത്തുവരിക. മുന്‍ഗാമിയായ വണ്‍പ്ലസ് 12ആര്‍ 8 ജിബി + 128 ജിബി, 16 ജിബി + 256 ജിബി ഓപ്ഷനുകളോടെയാണ് പുറത്തിറങ്ങിയത്. യഥാക്രമം 39,999, 45,999 എന്നിങ്ങനെയായിരുന്നു വണ്‍പ്ലസ് 12ആര്‍ വേരിയന്‍റുകളുടെ വില. പിന്നീട് കമ്പനി വണ്‍പ്ലസ് 12ആറിന്‍റെ 8 ജിബി + 256 ജിബി വേരിയന്‍റ് 42,999 രൂപയിലും ഇന്ത്യയില്‍ പുറത്തിറക്കിയിരുന്നു.