തോക്കും മാരകായുധങ്ങളുമായി എത്തിയ അഞ്ചംഗ സംഘത്തിൽ ഉൾപ്പെട്ട നാലാമനും പോലീസ് പിടിയിൽ

മലപ്പുറം: തോക്കും മാരകായുധങ്ങളുമായി എത്തിയ അഞ്ചംഗ സംഘത്തിൽ ഉൾപ്പെട്ട നാലാമനും പോലീസ് പിടിയിലായി . ചെട്ടിപ്പടി ആലുങ്ങൽ ബീച്ചിൽ കഴിഞ്ഞമാസമാണ് നാട്ടുകാർ പിടികൂടിയ ക്വട്ടേഷൻ സംഘത്തിലെ നാലാമനും പോലീസിൻ്റെ പിടിയിലായത് . താനൂർ സ്വദേശി കെ. തഫ്സീർ (24) ആണ് പരപ്പനങ്ങാടി എസ്.എച്ച്. ഒ. ഹരീഷിന്റെ നേതൃത്വത്തിലുള്ള അന്വേഷണ സംഘത്തിന്റെ വലയിലായത്. തുടർന്ന് ഇയാളെ പൊന്നാനി കോടതി റിമാൻ്റ് ചെയ്യുകയായിരുന്നു .

ചെട്ടിപ്പടി സ്വദേശിയായ യുവാവിനെ സ്വർണകള്ളക്കടത്തുമായി ബന്ധപ്പെട്ട് തോക്കും മാരകായുധങ്ങളുമായി വാഹനത്തിലെത്തിയ അഞ്ചംഗ സംഘത്തിൽ ഉൾപ്പെട്ട ആളായിരുന്നു തഫ്സീർ. യുവാവിനെ അന്വേഷിച്ചെത്തിയ ഇവർ നാട്ടുകാർക്കെതിരെ ഭീഷണി ഉയർത്തിയിരുന്നു .

തുടർന്ന് നാട്ടുകാർ സംഘത്തിലെ രണ്ടുപേരെ പിടികൂടി ഇലക്ട്രിക് പോസ്റ്റിൽ കെട്ടിയിട്ടതിന് ശേഷം പോലീസിനെ വിവരമറിയിക്കുകയായിരുന്നു . ഇതിനിടെ മൂന്നുപേർ കാറിൽ നിന്ന് രക്ഷപെട്ടു. ഇതിലൊരാളാണ് ഇപ്പോൾ പിടിയിലായ തഫ്സീർ. കേസിൽ രക്ഷപ്പെട്ട മറ്റൊരാളെ പോലീസ് നേരത്തേ പിടികൂടിയിരുന്നു. അഞ്ചാമൻ വിദേശത്തേക്ക് കടന്നതായാണ് പൊലീസിന് ലഭിക്കുന്ന വിവരം.