നയൻ താരയെപ്പോലെ വിവാഹം ഒടിടി പ്ലാറ്റ്ഫോമിന് വില്‍ക്കാനൊരുങ്ങി നാഗ ചൈതന്യയും ശോഭിതയും

ഹൈദരാബാദ്: ഏറ്റവും പുതിയ റിപ്പോര്‍ട്ട് അനുസരിച്ച് ടോളിവുഡ് താരം നാഗ ചൈതന്യയും നടി ശോഭിത ധൂലിപാലയും ഡിസംബർ 4 ന് വിവാഹിതരാകും. അടുത്ത കുടുംബാംഗങ്ങളും സുഹൃത്തുക്കളും സിനിമാ, രാഷ്ട്രീയ, ബിസിനസ് ലോകങ്ങളിൽ നിന്നുള്ള അതിഥികളും വിവാഹത്തിനുണ്ടാകും. ഹൈദരാബാദിലെ നാഗചൈതന്യയുടെ കുടുംബ സ്ഥാപനമായ അന്നപൂർണ സ്റ്റുഡിയോയിൽ വച്ചായിരിക്കും വിവാഹം എന്നാണ് വിവരം.

നാഗ ചൈതന്യയുടെയും ശോഭിതയുടെയും വിവാഹം ഒരു ഒടിടി പ്ലാറ്റ്ഫോമിന് വില്‍ക്കാനുള്ള ശ്രമം നടക്കുന്നുണ്ട് എന്നും റിപ്പോർട്ടുകൾ പറയുന്നു. ടോളിവുഡിലെ ഹൈ പ്രൊഫൈല്‍ വിവാഹം സ്ട്രീം ചെയ്യാനുള്ള പ്രത്യേക അവകാശം നേടുന്നതിന് നിരവധി സ്ട്രീമിംഗ് പ്ലാറ്റ്‌ഫോമുകൾ നാഗാർജുന കുടുംബവുമായി ചര്‍ച്ചയിലാണ് എന്നാണ് വിവരം.

റിപ്പോർട്ടുകൾ ശരിയാണെങ്കിൽ കോളിവുഡ് താരം നയൻതാരയുടെയും വിഘ്നേഷ് ശിവന്‍റെയും വിവാഹ ഡോക്യുമെന്‍ററിയായ നയൻതാര: ബിയോണ്ട് ദി ഫെയറിടെയ്‌ലിന്‍റെ മോഡലില്‍ നെറ്റ്ഫ്ലിക്സിലോ മറ്റോ ചായ്-ശോഭിതയുടെ വിവാഹം എത്തുമെന്നാണ് വിവരം.

നാഗ ചൈതന്യയുടെ രണ്ടാമത്തെ വിവാഹമാണ് ഇത്. നേരത്തെ നടി സാമന്തയുമായി നീണ്ടകാലത്തെ പ്രണയത്തിന് ശേഷം നാഗ ചൈതന്യ വിവാഹിതനായിരുന്നു. എന്നാല്‍ ഇത് അധികകാലം നീണ്ടില്ല. 2022ല്‍ ഇരുവരും നിയമപരമായി വേര്‍പിരിഞ്ഞു. പിന്നീടാണ് ശോഭിത ധൂലിപാലയുമായി നാഗ ചൈതന്യ പ്രണയത്തിലായതും വിവാഹത്തിലേക്ക് നീങ്ങിയതും. മലയാളത്തില്‍ ദുല്‍ഖര്‍ സല്‍മാന്‍റെ കുറുപ്പ് സിനിമയില്‍ അടക്കം അഭിനയിച്ച നടിയാണ് ശോഭിത ധൂലിപാല.