എഐ ‘വെതര്‍‌നെക്സ്റ്റ്’ മോഡലുകളുമായി ഗൂഗിള്‍

ന്യൂഡൽഹി: ആർട്ടിഫിഷ്യൽ ഇന്റലിജൻസ് തലമുറ ഭരിക്കുന്ന കാലമാണ്. ജീവിതത്തിന്റെ സമസ്ത മേഖലയിലും എഐയുടെ സ്വാധീനം എത്തിയിട്ടുണ്ട്. ഇനി മുതൽ ചൂട് കൂടുമോ, മഴ പെയ്യുമോ തുടങ്ങി കാലാവസ്ഥയുമായി ബന്ധപ്പെട്ട നിരവധി ചോദ്യങ്ങൾക്കും ഉത്തരം നൽകും എഐ. കൃത്യമായ കാലാവസ്ഥാ വിവരങ്ങൾ പ്രചരിക്കാൻ പുതിയ എഐ മോഡൽ പുറത്തിറക്കിയിരിക്കുകയാണ് ഗൂഗിൾ. വെതർനെക്സ്റ്റ് എന്ന പേരിൽ പുറത്തിറങ്ങുന്ന എഐ മോഡൽ ഗൂഗിൾ ഡീപ് മൈൻഡും ഗൂഗിൾ റിസർച്ചും സംയുക്തമായാണ് തയ്യാറാക്കിയിരിക്കുന്നത്. പരമ്പരാഗത കാലാവസ്ഥ പ്രവചന രീതികളേക്കാൾ കൂടുതൽ കൃത്യതയോടെയും കാര്യക്ഷമതയോടെയുമാണ് ഇത് പ്രവർത്തിക്കുന്നതെന്ന് ഗൂഗിൾ പറയുന്നു. ഗൂഗിൾ അവകാശപ്പെടുന്നതനുസരിച്ച് കമ്പനിയുടെ ഏറ്റവും നൂതനമായ കാലാവസ്ഥാ പ്രവചന എഐ സാങ്കേതിക വിദ്യയാണ് വെതർനെക്സ്റ്റ്.

നിലവിലെ കാലാവസ്ഥ പ്രവചന രീതികളുമായി താരതമ്യപ്പെടുത്തുമ്പോൾ എഐ മോഡലായ വെതർനെക്സ്റ്റ് കൂടുതൽ കൃത്യതയും കാര്യക്ഷമതയും വാഗ്ദാനം ചെയ്യുന്നുവെന്ന് ഗൂഗിൾ പറയുന്നു. കമ്പനിയുടെ ഏറ്റവും കൃത്യമായ കാലാവസ്ഥാ പ്രവചന എഐ സാങ്കേതിക വിദ്യയാണ് വെതർനെക്സ്റ്റ് എന്നാണ് ഗൂഗിളിന്‍റെ അവകാശവാദം. പരമ്പരാഗത ഭൗതിക ശാസ്ത്രത്തെ അടിസ്ഥാനമാക്കിയുള്ള കാലാവസ്ഥാ മോഡലുകളേക്കാൾ വേഗതയേറിയതും കൂടുതൽ കാര്യക്ഷമവുമാണ് വെതർനെക്സ്റ്റ് മോഡൽ എന്ന് ഗൂഗിൾ ഡീപ്‌മൈൻഡ് വ്യക്തമാക്കി.

വെതർനെക്സ്റ്റ് കുടുംബത്തിൽ രണ്ട് വ്യത്യസ്ത എഐ മോഡലുകൾ അടങ്ങിയിരിക്കുന്നു. ഇതിലൊന്ന് വെതർനെക്സ്റ്റ് ഗ്രാഫും, മറ്റൊന്ന് വെതർനെക്സ്റ്റ് ജനറലുമാണ്. ഇവ രണ്ടിന്റെയും പ്രത്യേകതകൾ ഇതൊക്കെയാണ്

1. വെതർനെക്സ്റ്റ് ഗ്രാഫ്

ആറ് മണിക്കൂർ റെസല്യൂഷനും 10 ദിവസത്തെ ലീഡ് സമയവും ഉള്ള പ്രവചനങ്ങൾ നൽകുന്ന ശക്തമായ മോഡലാണിത്. വേഗതയേറിയതും കൃത്യവുമായ പ്രവചനങ്ങൾക്ക് ഇത് അനുയോജ്യമാണ്. ഇന്ന് ഉപയോഗിക്കുന്ന മികച്ച സംവിധാനങ്ങളേക്കാൾ കൂടുതൽ കൃത്യമായ പ്രവചനങ്ങൾ വെതർനെക്സ്റ്റ് ഗ്രാഫ് നൽകുന്നുവെന്ന് ഗൂഗിൾ പറഞ്ഞു.

2 . വെതർനെക്സ്റ്റ് ജെൻ

ഈ മോഡലിന് 12 മണിക്കൂർ റെസല്യൂഷനും 15 ദിവസത്തെ ലീഡ് സമയവും ഉള്ള 50 കാലാവസ്ഥാ സാഹചര്യങ്ങൾ പ്രവചിക്കാൻ കഴിയും. ചുഴലിക്കാറ്റുകൾ പോലുള്ള തീവ്ര കാലാവസ്ഥാ സംഭവങ്ങൾ പ്രവചിക്കാൻ ഈ മോഡൽ പ്രത്യേകിച്ചും ഉപയോഗപ്രദമാണ്. ഗൂഗിൾ പറയുന്നതനുസരിച്ച്, വെതർനെക്സ്റ്റ് ജെന്നിന് നിരവധി സാധ്യതകൾ കൃത്യമായി പ്രവചിക്കാൻ കഴിയും. ഈ മോഡലിന് കാലാവസ്ഥയുടെ തീവ്രതയെ കുറിച്ച് ഉപഭോക്താക്കളോട് പറയാൻ കഴിയും. ഇത് പ്രകൃതി ദുരന്തങ്ങളില്‍ രക്ഷാപ്രവർത്തനം എളുപ്പമാക്കാന്‍ വഴിയൊരുക്കും എന്നാണ് ഗൂഗിൾ വിലയിരുത്തുന്നത്.