ഡീപ്പ് സീക്ക് വന്നതിന് പിന്നാലെ പുതിയ എഐ മോഡല്‍ സൗജന്യമാക്കി ഓപ്പണ്‍ എഐ

യുഎസ് വിപണിയിൽ ചൈനീസ് എഐ സ്റ്റാർട്ടപ്പായ ഡീപ്പ് സീക്ക് പുറത്തിറക്കിയ സൗജന്യ എഐ മോഡൽ വലിയ കോളിളക്കമുണ്ടാക്കിയതിന് പിന്നാലെ, ചാറ്റ് ജിപിടി ഉപഭോക്താക്കൾക്ക് സൗജന്യമായി പുതിയ എഐ മോഡൽ അവതരിപ്പിച്ചിരിക്കുകയാണ് ഓപ്പൺ എഐ. ഒ-3 മോഡൽ പുറത്തിറക്കുന്നതായി ഓപ്പൺ എഐ മേധാവി സാം ഓൾട്ട്മാൻ നേരത്തെ പ്രഖ്യാപിച്ചിരുന്നു.

ഇക്കഴിഞ്ഞ ഡിസംബറിൽ ഓപ്പൺ എഐയുടെ ഷിപ്പ്‌മസ് പ്രോഗ്രാമിൻ്റെ ഭാഗമായി അവതരിപ്പിക്കാനായിരുന്നു പദ്ധതി.
നിലവിലുള്ള റീസണിങ് മോഡലായ ഒ-1 നേക്കാൾ വേഗമേറിയ ഒ-3 ഗണിതം, കോഡിങ്, സയൻസ് എന്നിവയിൽ ഒ-1 മോഡലിന് ഒപ്പമാണ്. ഒ-1 മോഡലിനേക്കാൾ 24 ശതമാനം വേഗത്തിൽ ഒ-3 മറുപടി നൽകുമെന്നാണ് ഓപ്പൺ എഐയുടെ അവകാശവാദം. നമ്മുടെ ചോദ്യങ്ങൾക്ക് കൂടുതൽ കൃത്യമായ ഉത്തരങ്ങൾ നൽകാനും ഇതിന് സാധിക്കും. ഒ-1 മോഡലിനെ പോലെ ഉത്തരത്തിനൊപ്പം ആ ഉത്തരം എങ്ങനെ കണ്ടെത്തിയതെന്നും ഒ-3 മോഡൽ കാണിക്കും. പല ബെഞ്ച്‌മാർക്കുകളിലും ഒ-1 മോഡലിനെ മറികടക്കുന്ന പ്രകടനം ഒ-3 മോഡൽ കാഴ്ചവെക്കുന്നുണ്ട്.