യുവാവിനെ വാഹനം കയറ്റി കൊല്ലാന്‍ ശ്രമിച്ച കേസ്; പ്രതി പിടിയിൽ

കട്ടപ്പന : യുവാവിനെ വാഹനം കയറ്റി കൊല്ലാന്‍ ശ്രമിച്ച കേസിൽ പ്രതി പോലീസ് പിടിയിലായി . വാഹനം പാര്‍ക്ക് ചെയ്തതുമായി ബന്ധപ്പെട്ട തര്‍ക്കത്തെ തുടര്‍ന്ന് യുവാവിനെ കാര്‍ കയറ്റി കൊല്ലാന്‍ ശ്രമിച്ച കേസിലായിരുന്നു പ്രതിയെ അറസ്റ്റ് ചെയ്തത്. കാർ ഓടിച്ചിരുന്ന കല്‍ത്തൊട്ടി ചിറയില്‍ ജസ്റ്റിന്‍ (34) ആണ് കട്ടപ്പന പോലീസില്‍ കീഴടങ്ങിയത്. പ്രതിയെ അറസ്റ്റ് ചെയ്തതിന് ശേഷം ഇയാള്‍ക്കെതിരെ വധശ്രമത്തിന് പോലീസ് കേസെടുത്തിട്ടുണ്ട് .

കട്ടപ്പന സ്വദേശി കൊച്ചുതോവാള ചേന്നാട്ടുവീട്ടില്‍ ക്രിസ്റ്റോ മാത്യു(27)വിനെയാണ് ജസ്റ്റില്‍ കാര്‍ കയറ്റിയിറക്കിയത്. ഞായറാഴ്ച്ച രാത്രി 11 മണിയോടെ വാഹന പാര്‍ക്കിങ്ങുമായി ബന്ധപ്പെട്ട് ജസ്റ്റിനും സുഹൃത്തുക്കളും ക്രിസ്റ്റോയുമായി കട്ടപ്പന ഇടശേരി ബാറിന് സമീപത്ത് വെച്ച് തര്‍ക്കം ഉണ്ടായിരുന്നു .

തർക്കത്തിനൊടുവിൽ ക്രിസ്റ്റോ സെന്‍ട്രല്‍ ജങ്ഷനിലേക്ക് ബൈക്കില്‍ പോയി. എന്നാല്‍ ഇയാളെ പിന്തുടര്‍ന്ന ജസ്റ്റിന്‍, ക്രിസ്റ്റോയുടെ ബൈക്ക് സെന്‍ട്രല്‍ ജങ്ങ്ഷന് സമീപത്തുവെച്ച ശേഷം കാറുകൊണ്ട് ഇടിച്ച് തെറിപ്പിക്കുകയായിരുന്നു. ശേഷം കാറിടിപ്പിച്ച് വീഴ്ത്തിയ ക്രിസ്റ്റോയുടെ ശരീരത്തിലൂടെ ജസ്റ്റിന്‍ കാര്‍ കയറ്റിയിറക്കുകയായിരുന്നു .

തുടര്‍ന്ന് നാട്ടുകാരും ബൈക്കില്‍ ഒപ്പമുണ്ടായിരുന്ന മറ്റ് യുവാവും ചേര്‍ന്ന് ക്രിസ്റ്റോയെ സമീപത്തെ ആശുപത്രിയിലെത്തിക്കുകയായിരുന്നു . അപകടത്തിൽ ക്രിസ്റ്റോയുടെ ഒന്‍പത് വാരിയെല്ലുകള്‍ പൊട്ടുകയും ശ്വാസകോശത്തിനും ക്ഷതമേല്‍ക്കുകയും ചെയ്തിട്ടുണ്ട് .ക്രിസ്റ്റോയുടെ പരിക്കുകള്‍ ഗുരുതരമായതിനാല്‍ ക്രിസ്റ്റോയെ വിദഗ്ദ്ധ ചികിത്സയ്ക്ക് വേണ്ടി കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ഇയാളുടെ നില ഇപ്പോഴും അപകടകരമായി തുടരുകയാണ്.