സാമ്പത്തികമായി തകർന്നടിഞ്ഞെങ്കിലും പ്രതിരോധ ബജറ്റിൽ 20 ശതമാനം അധിക വർധന

ഓപ്പറേഷൻ സിന്ദൂറിന് പിന്നാലെ പ്രതിരോധ ബജറ്റിൽ 20 ശതമാനം വർദ്ധനവ് വരുത്തി പാകിസ്താൻ. മൊത്തം ബജറ്റിൽ 6.9 ശതമാനം കുറവ് വരുത്തിയപ്പോഴാണ് പ്രതിരോധ ബജറ്റ് 20 ശതമാനം വർദ്ധിപ്പിച്ചിരിക്കുന്നത്. അടുത്തകാലത്ത് പ്രതിരോധ ബജറ്റിൽ വരുത്തിയ ഏറ്റവും ഉയർന്ന വർദ്ധനവാണിത്. 274 ബില്യൺ യുഎസ് ഡോളറിൻ്റെ കടക്കെണിയിലായിരിക്കുമ്പോഴാണ് പാകിസ്താൻ പ്രതിരോധ ബജറ്റിൽ കുത്തനെയുള്ള വ‍ർ‌ദ്ധനവ് വരുത്തിയിരിക്കുന്നത് എന്നത് നിർണായകമാണ്. 20 ശതമാനം വർദ്ധിപ്പിച്ച് 2.55 ട്രില്യൺ രൂപയായി (9 ബില്യൺ ഡോളർ) ഉയർത്തിക്കൊണ്ട്, 2025-26 സാമ്പത്തിക വർഷത്തേക്കുള്ള വാർഷിക ഫെഡറൽ ബജറ്റ് ചൊവ്വാഴ്ച പാകിസ്ഥാൻ ധനമന്ത്രി മുഹമ്മദ് ഔറംഗസേബ് ആണ് അവതരിപ്പിച്ചത്.

2025-26 സാമ്പത്തിക വർഷത്തെ ഫെഡറൽ ബജറ്റിൽ ചെലവുകളുടെയും അറ്റ ​​വായ്പയുടെയും ആകെ തുക 17.573 ട്രില്യൺ പാകിസ്ഥാൻ രൂപയാണ് (62 ബില്യൺ ഡോളർ). ഇത് മുൻ വർഷത്തെ ബജറ്റിനേക്കാൾ 6.9 ശതമാനം കുറവാണ്. കഴിഞ്ഞ സാമ്പത്തിക വർഷത്തിൽ പ്രതിരോധത്തിനായി പാകിസ്ഥാൻ 2.1 ട്രില്യൺ പാകിസ്ഥാൻ രൂപ (7.45 ബില്യൺ ഡോളർ) അനുവദിച്ചു, ഇതിൽ ഉപകരണങ്ങൾക്കും മറ്റ് ആസ്തികൾക്കുമായി 2 ബില്യൺ ഡോളർ ഉൾപ്പെടുന്നു. സൈനിക പെൻഷനുകൾക്കായി 563 ബില്യൺ പാകിസ്ഥാൻ രൂപ (1.99 ബില്യൺ ഡോളർ) കൂടി നീക്കിവച്ചു, ഇവ ഔദ്യോഗിക പ്രതിരോധ ബജറ്റിൽ കണക്കാക്കില്ല. പ്രസംഗത്തിന്റെ തുടക്കത്തിൽ മുഹമ്മദ് ഔറംഗസേബ് പറഞ്ഞു: “രാജ്യം ദുഷ്‌കരമായ സമയങ്ങളിലൂടെ കടന്നുപോയ ചരിത്ര നിമിഷത്തിലാണ് ഈ ബജറ്റ് അവതരിപ്പിക്കുന്നത്.”

“രാജ്യം ഐക്യവും ദൃഢനിശ്ചയവും പ്രകടിപ്പിച്ച ചരിത്രപരമായ സമയത്താണ് ഈ ബജറ്റ് അവതരിപ്പിക്കുന്നത്,” അടുത്തിടെയുണ്ടായ ഇന്ത്യ-പാകിസ്ഥാൻ സംഘർഷത്തെക്കുറിച്ച് പരാമർശിച്ചുകൊണ്ട് അദ്ദേഹം പറഞ്ഞു. പാകിസ്ഥാനിലെ നികുതിദായകരുടെ എണ്ണം 100 ശതമാനം വർദ്ധിച്ചതായി അദ്ദേഹം പറഞ്ഞു. രാജ്യത്തിന്റെ കയറ്റുമതി വർദ്ധിപ്പിക്കുന്നതിനായി സർക്കാർ ഒരു താരിഫ് പരിഷ്കരണ പാക്കേജ് കൊണ്ടുവരുമെന്നും അദ്ദേഹം പറഞ്ഞു. പഴയ വായ്പകൾ തിരിച്ചടയ്ക്കാൻ അന്താരാഷ്ട്ര നാണയ നിധിയിൽ നിന്ന് വായ്പ തേടിയ പശ്ചാത്തലത്തിൽ കൂടിയാണ് പാകിസ്താൻ പ്രതിരോധ ബജറ്റ് വർദ്ധിപ്പിച്ചിരിക്കുന്നത്. പാകിസ്താൻ്റെ പ്രതിരോധ ബജറ്റ് വർഷങ്ങളായി ക്രമാനുഗതമായി വർദ്ധിച്ചു കൊണ്ടിരിക്കുകയാണ്.

ഓപ്പറേഷൻ സിന്ദൂരിനിടെ ഇന്ത്യ നടത്തിയ ആക്രമണത്തിൽ പാകിസ്താനിലെ വ്യോമകേന്ദ്രങ്ങൾക്ക് കനത്ത നഷ്ടം നേരിടേണ്ടി വന്നിരുന്നു. ഇതിന്റെ പശ്ചാത്തലത്തിലാണ് പാകിസ്താൻ പ്രതിരോധ ചെലവിൽ വൻവർദ്ധന വരുത്തിയിരിക്കുന്നതെന്നാണ് റിപ്പോർട്ട്. ഇന്ത്യയുമായുള്ള സമീപകാല സൈനിക സംഘർഷവും സിന്ധു നദീജല ഉടമ്പടി ഇന്ത്യ താൽക്കാലികമായി നിർത്തിവച്ചതുമാണ് തീരുമാനത്തിന് പിന്നിലെ പ്രധാന ഘടകങ്ങളെന്ന് പാകിസ്ഥാൻ ദിനപത്രമായ ഡോൺ റിപ്പോർട്ട് ചെയ്യുന്നുണ്ട്.

സാമ്പത്തികമായി പ്രതിസന്ധിയിലായി പാകിസ്താൻ ഐഎംഎഫിനെയാണ് പ്രധാനമായും സാമ്പത്തിക സ്രോതസ്സിനായി ആശ്രയിക്കുന്നത്. സമ്പദ്‌വ്യവസ്ഥയെ സുസ്ഥിരമാക്കാൻ 2023ൽ പാകിസ്താൻ അമേരിക്കയിൽ നിന്നും 3 ബില്യൺ ഡോളർ സ്റ്റാൻഡ്-ബൈ ക്രമീകരണം നേടിയിരുന്നു. 2024 സെപ്റ്റംബറിൽ പാകിസ്താന് 7 ബില്യൺ ഡോളർ സാമ്പത്തിക സഹായം ഐഎംഎഫ് അനുവദിച്ചിരുന്നു. ഐഎംഎഫ് നൽകുന്ന ഫണ്ടുകൾ സൈനിക ചെലവുകൾക്കായി നേരിട്ട് ഉപയോഗിക്കുന്നില്ലെങ്കിലും അവ പാകിസ്ഥാന്റെ സമ്പദ്‌വ്യവസ്ഥയെ സുസ്ഥിരമാക്കാൻ സഹായിക്കുന്നതായാണ് ചൂണ്ടിക്കാണിക്കുന്നത്.

ഐഎംഎഫ് വായ്പകൾ ലഭിക്കുന്നതിലൂടെ സർക്കാരിന് ആഭ്യന്തര ഫണ്ടുകൾ പ്രതിരോധ ചെലവിലേയ്ക്ക് തിരിച്ചുവിടാൻ സാധിക്കുന്നുണ്ട്. 1958 മുതൽ പാകിസ്ഥാൻ ഐഎംഎഫിൽ നിന്നും 20-ലധികം വായ്പകൾ എടുത്തിട്ടുണ്ട്. നിലവിൽ ഐഎംഎഫിൻ്റെ ഏറ്റവും വലിയ അഞ്ചാമത്തെ കടക്കാരനാണ് പാകിസ്താൻ. കൃഷി, ചില്ലറ വിൽപ്പന, റിയൽ എസ്റ്റേറ്റ് എന്നിവയ്ക്ക് നികുതി ഏർപ്പെടുത്തുന്നത് ഉൾപ്പെടെയുള്ള പരിഷ്കാരങ്ങളിലൂടെ നികുതി അടിത്തറ വിശാലമാക്കണമെന്ന് ഐ‌എം‌എഫ് പാകിസ്ഥാനോട് ആവശ്യപ്പെട്ടിരുന്നു.