അറ്റകുറ്റ പണി;സലാല സുല്‍ത്താന്‍ ഖാബൂസ് സ്ട്രീറ്റില്‍ ഗതാഗത നിയന്ത്രണം ഏര്‍പ്പെടുത്തി

അറ്റകുറ്റ പണികളുടെ ഭാഗമായി സലാല സുല്‍ത്താന്‍ ഖാബൂസ് സ്ട്രീറ്റില്‍ ഗതാഗത നിയന്ത്രണം ഏര്‍പ്പെടുത്തി ദോഫാര്‍ മുനിസിപ്പാലിറ്റി. റോയല്‍ ഒമാന്‍ പൊലീസുമായി സഹകരിച്ചാണ് നടപടി. അടുത്ത മാസം 12 വരെയാണ് നിയന്ത്രണം. ഈ കാലയളവില്‍ പ്രദേശത്ത് താൽകാലിക ഗതാഗത വഴിതിരിച്ചുവിടല്‍ ഏര്‍പ്പെടുത്തിയിട്ടുണ്ട്.

സുല്‍ത്താന്‍ ഖാബൂസ് സ്ട്രീറ്റിന്റെ പടിഞ്ഞാറ് ഭാഗത്തുനിന്നും വരുന്ന വാഹനങ്ങള്‍ റൗണ്ട് എബൗട്ടില്‍ നിന്നും വടക്കോട്ടും കിഴക്ക് ഭാഗത്തുനിന്നും പടിഞ്ഞാറോട്ട് പോകുന്ന വാഹനങ്ങള്‍ അല്‍ ഹഫ സ്ട്രീറ്റ് വഴി വടക്കോട്ടും തിരിയണം. എല്ലാ ഡ്രൈവര്‍മാരും ജാഗ്രത പാലിക്കണമെന്നും ഗതാഗത നിര്‍ദേശങ്ങള്‍ പാലിക്കണമെന്നും ബദല്‍ വഴികള്‍ ഉപയോഗിക്കണമെന്നും മുനിസിപ്പാലിറ്റി അഭ്യര്‍ത്ഥിച്ചു.