ഫിറ്റ്നസിലും ഫീൽഡിങ്ങിലും കൂടുതൽ ശ്രദ്ധ കേന്ദ്രീകരിക്കണം; വൈഭവിനോട് കോച്ച്

ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിന് വേണ്ടി മികച്ച പ്രകടനം കാഴ്ചവെച്ച 14 കാരൻ വൈഭവ് സൂര്യവംശി രണ്ട് വർഷത്തിനുള്ളിൽ ഇന്ത്യൻ ടീമിലെത്തുമെന്ന് താരത്തിന്റെ കോച്ച് അശോക് കുമാര്‍ പറഞ്ഞു. ഇതിനായി ഫിറ്റ്നസിലും ഫീൽഡിങ്ങിലും കൂടുതൽ ശ്രദ്ധ കേന്ദ്രീകരിക്കാൻ ശ്രമിക്കണമെന്നും വൈഭവിനെ അശോക് കുമാര്‍ ഉപദേശിച്ചു.

രാജസ്ഥാന്‍ റോയല്‍സ് ടീമിന്റെ പരിശീലകരായ രാഹുല്‍ ദ്രാവിഡിന്റേയും വിക്രം റാത്തോഡിന്റേയും ശിക്ഷണം വൈഭവിന്റെ ബാറ്റിങ്ങിന് കൂടുതൽ കരുത്ത് നൽകിയെന്നും അദ്ദേഹം വ്യക്തമാക്കി. ഐപിഎല്ലിന്റെ ഈ സീസണിൽ പതിനാലാം വയസ്സില്‍ അരങ്ങേറ്റം കുറിച്ച വൈഭവ് ഏഴ് ഇന്നിംഗ്‌സില്‍ നിന്ന് സെഞ്ച്വറിയടക്കം 252 റണ്‍സെടുത്തിരുന്നു.

ഇതിൽ ഗുജറാത്ത് ടൈറ്റന്‍സിനെതിരെ 35 പന്തിലെ ഫിഫ്‌റ്റിയും ഉൾപ്പെടുന്നു. ട്വന്റി 20യില്‍ സെഞ്ച്വറി നേടുന്ന പ്രായം കുറഞ്ഞ താരം, ഐപിഎല്ലില്‍ വേഗമേറിയ സെഞ്ച്വറി സ്വന്തമാക്കുന്ന ഇന്ത്യൻ താരം, ഒരു ഇന്നിങ്സിൽ ഏറ്റവും കൂടുതൽ സിക്‌സറുകൾ നേടുന്ന താരം തുടങ്ങി റെക്കോർഡുകളാണ് കൗമാരക്കാരൻ അന്ന് സ്വന്തം പേരിലാക്കിയത്. അതേസമയം ഇംഗ്ലണ്ട് പര്യടനത്തിനുള്ള ഇന്ത്യയുടെ അണ്ടര്‍ 19 ടീമില്‍ വൈഭവിനെ ഉള്‍പ്പെടുത്തിയിട്ടുണ്ട്.