ബലിപെരുന്നാൾ; ഖത്തറിൽ അഞ്ച് ദിവസം അവധി

ഖത്തറിൽ ബലിപെരുന്നാൾ അവധി ഇത്തവണ 5 ദിവസം. ദുൽഹജ്ജിന്റെ 9–ാം ദിവസം മുതൽ 13–ാമത്തെ ദിവസം വരെയാണ് അവധി ലഭിക്കുക. കഴിഞ്ഞ ദിവസം രാജ്യത്തിന്റെ ഔദ്യോഗിക പൊതു അവധി സംബന്ധിച്ച മന്ത്രിസഭാ തീരുമാനത്തിന് അമീർ ഷെയ്ഖ് തമീം ബിൻ ഹമദ് അൽതാനി അംഗീകാരം നൽകിയ പശ്ചാത്തലത്തിലാണ് ബലിപെരുന്നാൾ അവധി ദിനങ്ങൾ തീരുമാനിക്കപ്പെട്ടത്. ഇതു പ്രകാരം രാജ്യത്തെ സർക്കാർ മന്ത്രാലയങ്ങൾ, ഏജൻസികൾ, പൊതു സ്ഥാപനങ്ങൾ എന്നിവയ്ക്കെല്ലാം ജൂൺ 5 മുതൽ 9 വരെ ദിവസങ്ങളിലായിരിക്കും അവധി വരിക. ജൂൺ 6നാണ് ബലി പെരുന്നാൾ എന്നാണ് വിലയിരുത്തൽ.

മാസപ്പിറ ദൃശ്യമാകുന്നതനുസരിച്ച് ഔഖാഫ് മന്ത്രാലയത്തിലെ ചാന്ദ്രനിരീക്ഷണ കമ്മിറ്റിയാണ് ബലിപെരുന്നാൾ പ്രഖ്യാപിക്കുന്നത്. അതേസമയം ഇത്തവണത്തെ ബലിപെരുന്നാൾ അവധി തീയതികൾ സംബന്ധിച്ച് ഔദ്യോഗിക പ്രഖ്യാപനം വരും ദിവസങ്ങളിലുണ്ടാകും. അമീരി ദിവാൻ ആണ് പൊതു അവധി പ്രഖ്യാപിക്കുന്നത്.