ഇത്തിഹാദ് റെയിലിന്റെ പാസഞ്ചർ സർവീസ് 2026ൽ ആരംഭിക്കും

യുഎഇയുടെ സ്വപ്ന പദ്ധതി ഇത്തിഹാദ് റെയിലിന്റെ പാസഞ്ചർ സർവീസ് 2026ൽ ആരംഭിക്കും. പാസഞ്ചർ സർവീസ് യാഥാർഥ്യമാകുന്നതോടെ യുഎഇയിലെ വിവിധ എമിറേറ്റുകൾ തമ്മിലുള്ള യാത്രാദൂരം കുറയും.നിലവിൽ ദുബായിൽ മാത്രമാണു മെട്രോ സർവീസുള്ളത്. ദേശീയ റെയിൽ ശൃംഖലയുടെ ഏറ്റവും പുതിയ പുരോഗതി ഭരണാധികാരിയുടെ അൽ ദഫ്ര മേഖലയിലെ പ്രതിനിധി ഷെയ്ഖ് ഹംദാൻ ബിൻ സായിദ് അൽ നഹ്യാനോട് വിശദീകരിച്ചതായി ഇത്തിഹാദ് റെയിൽ പറഞ്ഞു. ഇത്തിഹാദ് റെയിൽ സിഇഒ ഷാദി മാലിക്കിന്റെ നേതൃത്വത്തിലുള്ള പ്രതിനിധി സംഘമാണ് നിർമാണ പുരോഗതിയും പാസഞ്ചർ സർവീസിന്റെ പ്രത്യേകതകളും വിശദീകരിച്ചത്. രാജ്യത്തെ ഏറ്റവും വലിയ തന്ത്രപ്രധാന ഗതാഗത പദ്ധതികളിലൊന്നാണ് പാസഞ്ചർ സർവീസ്.

അബുദാബി, ദുബായ്, ഷാർജ, ഫുജൈറ എന്നിവിടങ്ങളിലെ സ്റ്റേഷനുകളെക്കുറിച്ചു നേരത്തെ പ്രഖ്യാപിച്ചിരുന്നു. ഫുജൈറയിലെ സ്റ്റേഷൻ സകംകം പ്രദേശത്തും ഷാർജയിലേത് എയർപോർട്ടിനും യൂണിവേഴ്സിറ്റി സിറ്റിക്കും സമീപവുമാണ്. ദുബായ്, അബുദാബി സ്റ്റേഷനുകൾ ഔദ്യോഗികമായി വെളിപ്പെടുത്തിയിട്ടില്ലെങ്കിലും ദുബായിലേത് ജുമൈറ ഗോൾഫ് എസ്റ്റേറ്റിനു സമീപവും അബുദാബിയിലേത് ഡെൽമ മാളിന് എതിർവശത്ത് മുസഫ ഷാബിയ 11ലുമായിരിക്കുമെന്നാണ് സൂചന.