‘എല്ലാം ഓക്കെ അല്ലേ അണ്ണാ ?’; ആന്റണി പെരുമ്പാവൂരിന്റെ എഫ്. ബി പോസ്റ്റ് വൈറൽ

മലയാള സിനിമയില്‍ പുതിയ റെക്കോര്‍ഡുകള്‍ തീര്‍ത്ത് മുന്നേറുകയാണ് മുരളി ഗോപിയുടെ തിരക്കഥയില്‍ മോഹന്‍ലാലിനെ നായകനാക്കി പൃഥ്വിരാജ് സംവിധാനംചെയ്ത ‘എമ്പുരാന്‍’. ചിത്രം 250 കോടി ആഗോള കളക്ഷനും 100 കോടി തിയേറ്റര്‍ ഷെയറും നേടുകയും ഇന്‍ഡസ്ട്രി ഹിറ്റായി മാറുകയും ചെയ്തു. ഇപ്പോഴിതാ ചിത്രത്തിന്റെ നിര്‍മാതാവ് ആന്റണി പെരുമ്പാവൂരിന്റെ സോഷ്യല്‍ മീഡിയാ പോസ്റ്റ് ചര്‍ച്ചകള്‍ക്കിടയാക്കിയിരിക്കുകയാണ്. പൃഥ്വിരാജിനൊപ്പമുള്ള രണ്ട് ചിത്രങ്ങളാണ് ആന്റണി പെരുമ്പാവൂര്‍ പോസ്റ്റ് ചെയ്തിരിക്കുന്നത്. ‘എല്ലാം ഓക്കെ അല്ലേ അണ്ണാ ?’ എന്നാണ് ചിത്രങ്ങള്‍ക്ക് നല്‍കിയിരിക്കുന്ന തലക്കെട്ട്. ചിത്രങ്ങള്‍ ഇതിനോടകംതന്നെ സോഷ്യല്‍ മീഡിയ ഏറ്റെടുത്തിരിക്കുകയാണ്.

നേരത്തേ എമ്പുരാന്റെ ബജറ്റുമായി ബന്ധപ്പെട്ട് നിര്‍മാതാവ് സുരേഷ് കുമാര്‍ ഉന്നയിച്ച ആരോപണങ്ങള്‍ക്ക് മറുപടിയുമായി ആന്റണി പെരുമ്പാവൂര്‍ ഫെയ്‌സ്ബുക്കില്‍ നീണ്ട കുറിപ്പ് പങ്കുവെച്ചിരുന്നു. ഇത് പിന്നീട് അദ്ദേഹം നീക്കംചെയ്യുകയും ചെയ്തിരുന്നു. അന്ന് ഈ പോസ്റ്റ് ഷെയര്‍ ചെയ്തുകൊണ്ട് പൃഥ്വിരാജ് കുറിച്ച വാക്കുകളാണ് എല്ലാം ഓക്കെ അല്ലേ അണ്ണാ എന്നത്. ഈ വാക്കുകളാണ് ഇപ്പോള്‍ പൃഥ്വിരാജിനെ സോഷ്യല്‍ മീഡിയയില്‍ ടാഗ് ചെയ്തുകൊണ്ട് ആന്റണി പെരുമ്പാവൂര്‍ ആവര്‍ത്തിച്ചിരിക്കുന്നത്. പിന്നല്ല എന്നാണ് ഈ ചിത്രങ്ങള്‍ പങ്കുവെച്ചുകൊണ്ട് പൃഥ്വിരാജ് പറഞ്ഞത്. ലൂസിഫര്‍ മൂന്നാം ഭാഗം ഉപേക്ഷിച്ചിട്ടില്ല എന്ന് സന്തോഷം തോന്നുന്നുവെന്നും L3 പ്രഖ്യാപനം ഉടനുണ്ടായാല്‍ പ്രേക്ഷകരും ഓക്കെ ആകുമെന്നുമെല്ലാമാണ് പോസ്റ്റിന് വന്ന പ്രതികരണങ്ങള്‍.