മതപരിവർത്തനം നടത്തുന്നുവെന്ന് ആരോപിച്ച് ഒഡീഷയിൽ മലയാളി വൈദികർക്ക് നേരെ മർദനം; പോലീസ് മർദിച്ചത് പള്ളിയിൽ കയറി

ഭുവനേശ്വർ: പാക്കിസ്ഥാനിൽ നിന്ന് വന്ന് മതപരിവർത്തനം നടത്തുന്നുവെന്ന് ആരോപിച്ച് മലയാളി വൈദികരെ മർദിച്ചതായി പരാതി. ബെഹരാംപൂർ രൂപതയിലെ ജൂബ ഇടവക പള്ളി വികാരി ഫാ. ജോഷി ജോർജിനും സഹ വികാരിക്കുമാണ് പരിക്കേറ്റത്.

ഗ്രാമത്തിൽ കഞ്ചാവ് പരിശോധനയ്‌ക്കെത്തിയ പോലീസ് പള്ളിയിൽ കയറി മർദിച്ചുവെന്നാണ് വൈദികൻ പറയുന്നത്. പള്ളിയിൽ നിന്ന് പണം അപഹരിച്ചെന്നും മർദനമേറ്റ സഹ വികാരിക്ക് ഗുരുതരമായി പരിക്കേറ്റെന്നും ഫാ. ജോഷി ജോർജിൻ പറഞ്ഞു. മാർച്ച് 22നാണ് സംഭവം നടന്നതെന്നാണ് വിവരം.

സമാനമായ സംഭവം കഴിഞ്ഞ ചൊവ്വാഴ്ച മദ്ധ്യപ്രദേശിലെ ജബൽപൂരിലും ഉണ്ടായത് വാർത്തയായിരുന്നു. നിർബന്ധിത മതപരിവർത്തനം ആരോപിച്ച് മലയാളി വൈദികരെ വിശ്വ ഹിന്ദു പരിഷത്ത് പ്രവർത്തകരാണ് ക്രൂരമായി മർദ്ദിച്ചത്. ഇതിന്റെ ദൃശ്യങ്ങൾ നേരത്തെ പുറത്തുവന്നിരുന്നു. സ്ത്രീകളും കുട്ടികളുമുൾപ്പെടെയുള്ള സംഘത്തെ ജയ് ശ്രീറാം മുദ്രാവാക്യം വിളിച്ചെത്തിയ സംഘം ക്രൂരമായി മർദ്ദിച്ചെന്നും അസഭ്യം പറഞ്ഞെന്നും മർദനമേറ്റ വൈദികൻ ഫാ. ഡേവിസ് ജോർജ് പ്രതികരിച്ചിരുന്നു.

ജൂബിലി ആഘോഷങ്ങളുടെ ഭാഗമായി മണ്ട്ലയിൽനിന്ന് വിവിധ പള്ളികളിലേക്ക് ബസിൽ പോവുകയായിരുന്ന ക്രൈസ്തവ വിശ്വാസി സംഘത്തെ വി എച്ച് പി പ്രവർത്തകർ തടഞ്ഞ് പൊലീസ് സ്റ്റേഷനിലേക്ക് കൊണ്ടുപോകുകയായിരുന്നു. ഇവരെ സഹായിക്കുന്നതിനായി സ്റ്റേഷനിലെത്തിയതാണ് മലയാളി വൈദികരായ ഫാ. ഡേവിസ് ജോർജും ഫാ. ജോർജും തുടന്നായിരുന്നു ഇവർക്കും പോലീസുകാർ നോക്കി നിൽക്കെയാണ് മർദനമേറ്റത്.