ജൂണിൽ വിവാഹം നടക്കാനിരിക്കെ അപകടം; വയനാട് സ്വദേശിയും പ്രതിശ്രുത വധുവും ഉൾപ്പെടെ അഞ്ച് പേർ മരിച്ചു

ജിദ്ദ: സൗദി അറേബ്യയിൽ ബുധനാഴ്ച നടന്ന വാഹനാപകടത്തിൽ വയനാട് സ്വദേശിയായ വരനും പ്രതിശ്രുത വധുവും മരിച്ചു. അമ്പലവയൽ ഇളയിടത്തുമഠത്തിൽ അഖിൽ അലക്സ്(27) , വയനാട് നടവയൽ നെയ്ക്കുപ്പ കാരിക്കൂട്ടത്തിൽ ബൈജു നിസി ദമ്പതികളുടെ മകൾ ടിന ബിജു (26) എന്നിവരാണ് മരിച്ചത്. ജൂണിൽ നടക്കാനിരുന്ന വിവാഹത്തിന് തയ്യാറെടുക്കുന്നതിനിടെയാണ് ഇരുവരും മരണപ്പെട്ടത്. അലക്സിനും ടീനയ്ക്കും ഒപ്പമുണ്ടായിരുന്ന മദീനയിൽ നിന്നുള്ള മൂന്ന് സൗദി പൗരന്മാർക്കും അപകടത്തിൽ ജീവൻ നഷ്ടപ്പെട്ടു.

മദീനയിലെ കാർഡിയാക് സെന്ററിൽനിന്ന് അൽ ഉല സന്ദർശിക്കാൻ പോകുന്നതിനിടെയാണ് അപകടം. അൽ ഉലയിൽനിന്ന് 150 കിലോമീറ്റർ അകലെയാണ് അപകടമുണ്ടായത്. മൃതദേഹങ്ങൾ ഭൂരിഭാഗവും കത്തിക്കരിഞ്ഞ നിലയിലാണ്. വാഹനങ്ങൾ കൂട്ടിയിടിച്ച് കത്തിയാണ് അപകടമുണ്ടായത്. വയനാട് കൽപറ്റ സ്വദേശിയായ അലക്സ് ഈയിടെയാണ് മദീനയിൽ സന്ദർശനത്തിനായി എത്തിയത്. മദീന കാർഡിയാക് സെന്ററിൽ രണ്ടു വർഷമായി നഴ്സ് ആയി ജോലി ചെയ്യുകയായിരുന്നു ടീന ബിജു. ജൂൺ 16ന് ടീനയും അഖിലും തമ്മിലുള്ള വിവാഹം നിശ്ചയിച്ചിരിക്കുക ആയിരുന്നു. കല്യാണവുമായി ബന്ധപ്പെട്ട് നാട്ടിലേക്ക് തിരിക്കാനുള്ള തയ്യാറെടുപ്പിനിടയിലാണ് അപകടം.