ബൈക്ക് യാത്രികരെ ഇടിച്ചിട്ട ശേഷം വാഹനം നിർത്താതെ പോയ സംഭവം; കാറും ഡ്രൈവറും പോലീസ് കസ്റ്റഡിയിൽ

കോഴിക്കോട്: വടകര കുറുമ്പയിൽ ബൈക്ക് യാത്രികരെ ഇടിച്ച ശേഷം നിർത്താതെ പോയ കാർ പോലീസ് പിടികൂടി. സംഭവം നടന്ന് പതിനെട്ട് ദിവസങ്ങൾക്കിപ്പുറമാണ് കാറും ഡ്രൈവറും പോലീസ് കസ്റ്റഡിയിലാകുന്നത്. സംഭവത്തിൽ കല്ലാച്ചി സ്വദേശി മുഹമ്മദ് മുഷായേലിനെയാണ് വടകര പോലീസ് കസ്റ്റഡിയിലെടുത്തത്.

മാർച്ച് 14 വൈകീട്ട് അഞ്ചരയോടെയായിരുന്നു കേസിനാസ്പദമായ സംഭവം. കക്കട്ട് സ്വദേശികളായ സജിത്, സുധി എന്നിവർ സഞ്ചരിച്ച ബൈക്കിൽ കാർ ഇടിക്കുകയായിരുന്നു. ശേഷം വാഹനം നിർത്താതെ പോകുകയും ചെയ്തു. പരിക്കേറ്റ ബൈക്ക് യാത്രികർ ആശുപത്രിയിൽ ചികിത്സയിൽ കഴിയുകയായിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി കുടുങ്ങിയത്. പ്രതിയും അയാൾ സഞ്ചരിച്ച കാറും നിലവിൽ പോലീസ് കസ്റ്റഡിയിലാണ്.