കാലിക്കറ്റ് യൂണിവേഴ്സിറ്റിക്കെതിരേ ഉത്തരക്കടലാസ് കാണാനില്ലെന്ന് പരാതി

കോഴിക്കോട്: കേരള സർവകലാശാലയിൽ ഉത്തരക്കടലാസ് നഷ്ടപ്പെട്ട വാർത്ത പുറത്തുവന്നതിനു പിന്നാലെ കാലിക്കറ്റ് യൂണിവേഴ്സിറ്റിയിലും ഉത്തരക്കടലാസ് കാണാനില്ലെന്ന് പരാതി. വയനാട് ഓറിയന്റല്‍ കോളേജില്‍ പഠിച്ച ഹോട്ടല്‍ മാനേജ്‌മെന്റ് വിദ്യാര്‍ഥിയുടെ പുനര്‍മൂല്യനിര്‍ണയത്തിന് നല്‍കിയിരുന്ന ഉത്തരക്കടലാസാണ് നഷ്ടപ്പെട്ടിരിക്കുന്നത്. സംഭവവുമായി ബന്ധപ്പെട്ട് വിദ്യാര്‍ഥി പരാതി നല്‍കിയിട്ടുണ്ട്.

കഴിഞ്ഞ വര്‍ഷം ജൂണ്‍ 29-നാണ് പുനര്‍മൂല്യനിര്‍ണയത്തിന് നല്‍കുന്നത്. എന്നാൽ, ഉത്തരക്കടലാസ് പുനര്‍മൂല്യനിര്‍ണയത്തിന് നല്‍കി ആറ് മാസത്തിനുശേഷം ഫലം വരാത്തത് അന്വേഷിച്ചതിന് പിന്നാലെയാണ് ഉത്തരക്കടലാസ് കാണാനില്ലെന്ന കാര്യം അറിയുന്നതെന്ന് വിദ്യാർത്ഥിയുടെ മാതാവ് പറഞ്ഞു. മാസങ്ങള്‍ കഴിഞ്ഞിട്ടും ഫലം വരാത്തതിനെ തുടര്‍ന്ന് സര്‍വകലാശാലയില്‍ എത്തി അന്വേഷിച്ചപ്പോള്‍ മൂല്യനിര്‍ണയം പുരോഗമിക്കുകയാണെന്നാണ് അറിയിച്ചത്. പിന്നീട് ഇതുമായി ബന്ധപ്പെട്ട വിവരങ്ങള്‍ ലഭിക്കുന്നതിനായി ഒരു നമ്പര്‍ ഉദ്യോഗസ്ഥര്‍ നല്‍കിയിരുന്നു. ഈ നമ്പറില്‍ വിളിച്ചപ്പോഴെല്ലാം മറ്റുപലരേയും ബന്ധപ്പെടാനായിരുന്നു പറഞ്ഞിരുന്നതെന്നും വിദ്യാര്‍ഥിയുടെ അമ്മ കുറ്റപ്പെടുത്തുന്നു.

അമ്മ നേരിട്ട് സര്‍വകലാശാലയില്‍ എത്തിയപ്പോഴും പുനര്‍മൂല്യനിര്‍ണയും പുരോഗമിക്കുകയാണെന്നാണ് ഉദ്യോഗസ്ഥര്‍ അറിയിച്ചത്. പിന്നീട് മറ്റ് വഴികളില്‍ നടത്തിയ അന്വേഷണത്തിലാണ് പേപ്പര്‍ നഷ്ടപ്പെട്ട വിവരം വിദ്യാര്‍ഥിയുടെ കുടുംബം അറിയുന്നത്. പേപ്പര്‍ മൂല്യനിര്‍ണയത്തിന് നല്‍കിയ വിദ്യാര്‍ഥി പിന്നീട് ജോലി ശരിയായതിനെ തുടര്‍ന്ന് ഗള്‍ഫിലേക്ക് പോകുകയായിരുന്നു. ഇതിനുശേഷമാണ് മൂല്യനിര്‍ണയത്തിന്റെ റിസള്‍ട്ട് സംബന്ധിച്ച് അന്വേഷിക്കാന്‍ മാതാവിനോട് ആവശ്യപ്പെടുന്നത്.

സര്‍വകലാശാലയില്‍ നിന്ന് പ്രതികരണം ഒന്നും ഇല്ലാതായതോടെയാണ് കണ്‍ട്രോളര്‍ ഓഫ് എക്‌സാമിനേഷനില്‍ ബന്ധപ്പെടുകയായിരുന്നു. ഇവര്‍ നടത്തിയ പരിശോധനയിലാണ് ഉത്തരക്കടലാസ് നഷ്ടപ്പെട്ടുവെന്നുള്ള വിവരം അറിയുന്നത്.