ബസ് യാത്രക്കാരിയുടെ മാല കവർന്ന യുവതി പിടിയിൽ

കോട്ടയം: പാമ്പാടിയിൽ ബസിൽ യാത്ര ചെയ്തിരുന്ന സ്ത്രീയുടെ മാല കവർന്ന യുവതി പിടിയിൽ. മീനടം സ്വദേശി മിനി തോമസാണ് അറസ്റ്റിലായത്. പാമ്പാടി പോലീസാണ് പ്രതിയെ പിടികൂടിയത്. നിരവധി മോഷണക്കേസുകളിൽ പ്രതിയാണ് മിനി. കുറച്ച് ദിവസങ്ങളായി ഇവർ പാമ്പാടി പോലീസിന്റെ നിരീക്ഷണത്തിലായിരുന്നു.

കൂരോപ്പട സ്വദേശിനിയുടെ ഒരു പവൻ തൂക്കമുള്ള മാലയാണ് മിനി കവർന്നത്. ഇന്നലെയായിരുന്നു സംഭവം. മോഷ്ടിച്ച മാല ഇവർ കോട്ടയത്തെ ഒരു ജ്വല്ലറിയിൽ വിൽക്കുകയും ചെയ്തു. പ്രതിയെ ജ്വല്ലറിയിൽ എത്തിച്ച് പൊലീസ് തെളിവെടുത്തു. നിരവധി മോഷണക്കേസുകളിൽ പ്രതിയായ മിനി കൂടുതലായും തിരക്കേറിയ ബസുകൾ കേന്ദ്രീകരിച്ചാണ്ർ മോഷണം നടത്തുന്നത്. തിരക്കിനിടയിൽ നിന്ന് ഞൊടിയിടയിൽ മോഷണം നടത്തുന്നതാണ് ഇവരുടെ രീതി എന്ന് പോലീസ് പറഞ്ഞു. പ്രതിയെ ഇന്ന് തന്നെ കോടതിയിൽ ഹാജരാക്കും.