പാലക്കാട്: ചെർപ്പുളശേരിയിൽ വ്യാപാര സ്ഥാപനങ്ങളിൽ നിന്നു സാധനങ്ങൾ വാങ്ങിയശേഷം വ്യാജ ആപ് ഉപയോഗിച്ചു തട്ടിപ്പ് നടത്തിയ രണ്ട് വിദ്യാർഥികൾ പിടിയിൽ. വ്യാപാരികളാണ് വിദ്യാർഥികളെ പിടികൂടി പോലീസിനു കൈമാറിയത്‌.
ചെർപ്പുളശേരിയിലെ വസ്ത്ര വിൽപനശാലയിലും ഫാൻസി കടയിൽനിന്നും സാധനങ്ങൾ വാങ്ങിയ വിദ്യാർഥികൾ വ്യാജ ആപ് ഉപയോഗിച്ച് തട്ടിപ്പ് നടത്തിയത്.
ഗൂഗിൾ പേ വഴിയാണ് വിദ്യാർഥികൾ സാധനങ്ങൾക്ക് പണം നൽകിയത്. ആപ് ഉപയോഗിച്ച് സ്‌കാൻ ചെയ്ത പണം അയച്ചതായി ഇവർ ഭാവിച്ചു. തുക അയച്ചതിന്‍റെ ചിഹ്നം മൊബൈൽ ഫോണിൽ കാണിച്ചെങ്കിലും കട ഉടമയുടെ അക്കൗണ്ടിലേക്ക് തുക എത്തിയില്ല.
പണം കിട്ടിയില്ലെന്ന് മനസിലാക്കിയ കടയുടമ വിദ്യാർഥികളെ ചോദ്യം ചെയ്തതോടെയാണ് വ്യാജ ആപ് വിവരം അറിഞ്ഞതെന്നു വ്യാപാരികൾ പറയുന്നു. സംഭവത്തിൽ ചെർപ്പുളശേരി പോലീസ് അന്വേഷണം ആരംഭിച്ചു.
