ആ സംഭവത്തെ ഓർത്ത് ഞാൻ ഇന്നും ഖേദിക്കുന്നു: തുറന്നു പറഞ്ഞ് ധോണി

ഐപിഎല്‍ കരിയറില്‍ ഏറ്റവുമധികം ഖേദിക്കുന്ന നിമിഷത്തെപ്പറ്റി തുറന്നുപറഞ്ഞ് ഇന്ത്യന്‍ ക്രിക്കറ്റ് ഇതിഹാസ നായകന്‍ മഹേന്ദ്ര സിങ് ധോണി. 2019 ലെ ഐപിഎല്‍ സീസണില്‍ ചെന്നൈ സൂപ്പര്‍ കിംഗ്സും രാജസ്ഥാന്‍ റോയല്‍സും തമ്മില്‍ നടന്ന ഫൈനലിനിടെ മൈതാനത്തേക്ക് ഇറങ്ങിവന്ന് ധോണി ദേഷ്യം പ്രകടിപ്പിച്ചത് വലിയ വാര്‍ത്തയായിരുന്നു. എന്നാല്‍ ആ സംഭവമാണ് താനിന്ന് ഏറ്റവും കൂടുതല്‍ ഖേദിക്കുന്ന നിമിഷമെന്ന് തുറന്നുപറയുകയാണ് ധോണി. ഇത്തരം സാഹചര്യങ്ങളില്‍ താന്‍ സംയമനം പാലിക്കേണ്ടിയിരുന്നു എന്നാണ് ധോണി പറഞ്ഞത്.

ഒരു ഐപിഎല്‍ മത്സരത്തിനിടെ ഞാന്‍ മൈതാനത്തേക്ക് ഇറങ്ങിച്ചെന്നിട്ടുണ്ട്. അതൊരു വലിയ പിഴവായിരുന്നു. അതിന് മുന്‍പും ഒരുപാട് സാഹചര്യത്തില്‍ എനിക്ക് ഇങ്ങനെ ദേഷ്യം തോന്നിയിട്ടുണ്ട്. കാരണം നമ്മള്‍ ഒരു കായിക മത്സരമാണ് കളിക്കുന്നത്. അതുകൊണ്ട് തന്നെ അപ്പോള്‍ അനുഭവിക്കുന്ന സമ്മര്‍ദ്ദവും വലുതായിരിക്കും. എല്ലാ മത്സരങ്ങളിലും വിജയം സ്വന്തമാക്കുക എന്ന ലക്ഷ്യത്തോടെയാണ് നമ്മള്‍ മൈതാനത്ത് ഇറങ്ങുന്നത്. അതുകൊണ്ടു തന്നെ നമുക്ക് ഇത്തരത്തില്‍ ദേഷ്യം ഉണ്ടാവാനുള്ള സാധ്യത വളരെ വലുതാണ്. ഈ സാഹചര്യങ്ങളില്‍ പ്രതികരിക്കാതെ മാറിപ്പോവുക എന്നതാണ് ചെയ്യേണ്ടത്. കൃത്യമായി ശ്വാസമെടുത്ത് നമുക്ക് സമ്മര്‍ദ്ദത്തെ അതിജീവിക്കാന്‍ സാധിക്കണം’, ധോണി പറഞ്ഞു.