മലയോര മേഖലകളിൽ പെരുമ്പാമ്പ് ശല്യം രൂക്ഷം

പെരുന്തട്ടയിൽ നിന്നും വീണ്ടും ഭീമൻ പെരുമ്പാമ്പിനെ പിടികൂടി. തേയില തോട്ടത്തോട് ചേർന്നുള്ള സ്ഥലത്തുനിന്നുമാണ് പെരുമ്പാമ്പിനെ പിടികൂടിയത്. വനം വകുപ്പിന് വേണ്ടി പാമ്പിനെ പിടിക്കുന്ന മുൻ കോഫി ബോർഡ് ഉദ്യോഗസ്ഥൻ മഹേഷ് ആണ് പാമ്പിനെ പിടികൂടിയത്. തേയിലത്തോട്ടത്തിൽ നിന്നും ഇഴഞ്ഞുനീങ്ങുന്ന നിലയിലാണ് പാമ്പിനെ കണ്ടത്. തുടർന്ന് തൊഴിലാളികൾ വനം വകുപ്പിനെ വിവരം അറിയിച്ചു. തുടർന്നാണ് മഹേഷ് സ്ഥലത്ത് എത്തി സാഹസികമായി പാമ്പിനെ പിടികൂടിയത്.

രണ്ടാഴ്ചയ്ക്കിടെ ഇത് രണ്ടാം തവണയാണ് ഭീമൻ പെരുമ്പാമ്പിനെ പ്രദേശത്തു നിന്നും പിടികൂടുന്നത്. നേരത്തെ തേയിലത്തോട്ടം തൊഴിലാളികൾ ജോലി ചെയ്യുന്നതിനിടയിലാണ് പാമ്പിനെ കണ്ടിരുന്നത്. തേയില ചെടികൾക്കടിയിൽ ചുറ്റിക്കിടക്കുന്ന നിലയിലായിരുന്നു പാമ്പ്. പുലി, കടുവ ഉൾപ്പെടെയുള്ള വന്യ മൃഗങ്ങൾക്ക് പുറമേ സ്ഥിരമായി പെരുമ്പാമ്പിനെ കൂടി കാണാൻ തുടങ്ങിയതോടെ തോട്ടം തൊഴിലാളികൾ ആശങ്കയിലായി.