ആധുനിക ഡിസൈൻ; ഹാരിയര്‍ ഇവിയുടെ ഇന്റീരിയര്‍ ഫീച്ചറുകള്‍ പുറത്ത്

വിപണിയിലെത്തുന്നതിന് മുൻപ് തന്നെ ഹാരിയര്‍ ഇവിയുടെ ഇന്റീരിയര്‍ ഫീച്ചറുകള്‍ പുറത്ത് വന്നു. ഹാരിയര്‍ ഐസിഇ വകഭേദത്തിന്റേതിന് സമാനമായ ഇന്റീരിയര്‍ സവിശേഷതകളാണ് പ്രധാനമായും ഹാരിയര്‍ ഇവിക്കുമുള്ളത്. നേരത്തെ ഓട്ടോ എക്‌സ്‌പോ 2025ല്‍ ഹാരിയര്‍ ഇവി പ്രദര്‍ശിപ്പിച്ചിരുന്നു. ഇപ്പോള്‍ ടാറ്റ മോട്ടോഴ്‌സ് പുറത്തുവിട്ട ടീസര്‍ വീഡിയോയില്‍ നാല് ഹാരിയര്‍ ഇവികളാണുള്ളത്.

ഹാരിയറിലുള്ള ആന്‍ഡ്രോയിഡ് ഓട്ടോ/ ആപ്പിള്‍ കാര്‍പ്ലേ പിന്തുണയുള്ള 12.3 ഇഞ്ച് ഫ്രീ സ്റ്റാന്‍ഡിങ് ഇന്‍ഫോടെയിന്‍മെന്റ് സ്‌ക്രീനും 10.25 ഇഞ്ച് ടിഎഫ്ടി ഇന്‍സ്ട്രുമെന്റും ഫുള്‍സ്ക്രീന്‍ മാപ്പ് വ്യൂ അടക്കമുള്ള ആധുനിക സൗകര്യങ്ങളും ഹാരിയര്‍ ഇവിയിലുമുണ്ട്. ഹാരിയറിലേത് പോലുള്ള സെന്റര്‍ കണ്‍സോളാണ് ഹാരിയര്‍ ഇവിക്കും നല്‍കിയിരിക്കുന്നത്.

ഐസിഇ മോഡലിലെ അതേ ഗിയര്‍ സെലക്ടറാണ് ഇവിയിലുമുള്ളത്. ഡ്യുവല്‍ സോണ്‍ ക്ലൈമറ്റ് കണ്‍ട്രോളിലും ഇലക്ട്രോണിക് പാര്‍ക്കിങ് ബ്രേക്കിലും ഡ്യുവല്‍ പെയ്ന്‍ സണ്‍ റൂഫിലുമൊന്നും മാറ്റങ്ങളില്ല. ഹാരിയര്‍ ഇവിയുടെ ഇന്‍ഫോടെയിന്‍മെന്റ്, ഇന്‍സ്ട്രുമെന്റ് സ്‌ക്രീനുകളില്‍ ഇവിക്ക് സവിശേഷമായുള്ള ഗ്രാഫിക്‌സ് പ്രതീക്ഷിക്കാം. പിന്നില്‍ ഇന്‍ഡിപെന്‍ഡന്റ് സസ്‌പെന്‍ഷനാണെന്നതാണ് ഐസിഇ മോഡലിനില്ലാത്ത മറ്റൊരു സവിശേഷത. സ്വാഭാവികമായും ഹാരിയര്‍ ഇവിയില്‍ കുറഞ്ഞ ശബ്ദവും കുലുക്കവും ഉയര്‍ന്ന യാത്രാ സുഖവും പ്രതീക്ഷിക്കാം.