ഡ്രാഗണിലെ വേഷം വന്‍ ഹിറ്റ്; അടുത്ത നാഷണല്‍ ക്രഷ് ‘കയാദു ലോഹർ’ !

വന്‍ ഹിറ്റായി മാറിക്കൊണ്ടിരിക്കുന്ന ചിത്രമാണ് പ്രദീപ് രംഗനാഥന്‍ നായകനായ ‘ഡ്രാഗണ്‍’. ചിത്രം ഏറെ ശ്രദ്ധ നേടുമ്പോള്‍ തന്നെ വന്‍ ശ്രദ്ധ ലഭിക്കുകയാണ് ചിത്രത്തിലെ നായികമാരില്‍ ഒരാളായ കയാദു ലോഹറിനും. അടുത്ത നാഷണല്‍ ക്രഷ് എന്ന രീതിയിലാണ് കയാദു ലോഹറിനെ സോഷ്യല്‍ മീഡിയ വിശേഷിപ്പിക്കുന്നത്.

ചിത്രത്തില്‍ പ്രദീപ് രംഗനാഥന്‍ അവതരിപ്പിക്കുന്ന കഥാപാത്രം വിവാഹം കഴിക്കാന്‍ പോകുന്ന പെണ്‍കുട്ടി എന്ന റോളിലാണ് കയാദു ലോഹര്‍ എത്തുന്നത്. ഈ വേഷം താരം ഗംഭീരമാക്കിയെന്നാണ് പൊതുവില്‍ വിലയിരുത്തല്‍. ചിത്രത്തിലെ പ്രീ ക്ലൈമാക്സിന് മുന്‍പ് ഒരു വിവാഹ ചടങ്ങില്‍ താരത്തിന്റെ ഡാന്‍സ് ഇതിനകം തന്നെ സോഷ്യല്‍ മീഡിയയില്‍ വന്‍ ചര്‍ച്ചയായിട്ടുണ്ട്.

അസമിലെ തേസ്പൂർ സ്വദേശിയാണ് താരം. നിലവിൽ മഹാരാഷ്ട്രയിലെ പൂനെയിലാണ് താരം താമസിക്കുന്നത്. താരം കന്നഡ സിനിമയിലൂടെയാണ് സിനിമ രംഗത്തേക്ക് വന്നത്. മുഗിൽപേട്ട എന്ന കന്നഡ ചിത്രമാണ് ആദ്യ ചിത്രം. മലയാളത്തില്‍ വിനയന്‍ സംവിധാനം ചെയ്ത പത്തൊന്‍പതാം നൂറ്റാണ്ട് എന്ന ചിത്രത്തിലെ നങ്ങേലി എന്ന വേഷം ഏറെ ശ്രദ്ധിക്കപ്പെട്ടിരുന്നു.