ബഹിരാകാശ നിലയത്തിൽ ഭക്ഷണമെത്തിക്കുന്നത് ലൈവായി കാണിക്കാനൊരുങ്ങി നാസ

അന്താരാഷ്ട്ര ബഹിരാകാശ നിലയത്തിലെ (ഐഎസ്എസ്) സഞ്ചാരികള്‍ക്ക് ഏകദേശം മൂന്ന് ടൺ ഭക്ഷണം, ഇന്ധനം, മറ്റ് സാധനങ്ങൾ എന്നിവ എത്തിക്കുന്ന റോസ്‌കോസ്‌മോസ് കാർഗോ ബഹിരാകാശ പേടകത്തിന്‍റെ വിക്ഷേപണവും ഡോക്കിംഗും ലോകത്തെ ലൈവായി കാണിക്കാനൊരുങ്ങി നാസ. ഫെബ്രുവരി 27 വ്യാഴാഴ്ച വൈകുന്നേരം 4:24ന് പൈലറ്റില്ലാത്ത റോസ്‌കോസ്‌മോസ് പ്രോഗ്രസ് 91 ബഹിരാകാശ പേടകം കസാക്കിസ്ഥാനിലെ ബൈക്കോണൂർ കോസ്‌മോഡ്രോമിൽ നിന്ന് സോയൂ റോക്കറ്റിൽ വിക്ഷേപിക്കും.

നാസ പ്ലസിൽ വൈകുന്നേരം 4 മണിക്ക് ലോഞ്ച് ലൈവ് കവറേജ് ആരംഭിക്കും. സോഷ്യൽ മീഡിയ ഉൾപ്പെടെയുള്ള വിവിധ പ്ലാറ്റ്‌ഫോമുകളിലൂടെ ഇത് ലൈവായി കാണാൻ സാധിക്കും. സ്റ്റേഷനിലേക്കുള്ള രണ്ട് ദിവസത്തെ ഭ്രമണപഥ യാത്രയ്ക്ക് ശേഷം, മാർച്ച് 1 ശനിയാഴ്ച വൈകുന്നേരം 6:03 ന് ബഹിരാകാശ പേടകം സ്വെസ്ഡ സർവീസ് മൊഡ്യൂളിന്‍റെ പിൻ പോർട്ടിൽ ഓട്ടോമാറ്റിക്കായി ഡോക്ക് ചെയ്യും. നാസയുടെ ഡോക്കിംഗ് കവറേജ് അന്നേദിനം വൈകുന്നേരം 5:15ന് നാസ പ്ലസിൽ ആരംഭിക്കും. ഏകദേശം ആറ് മാസത്തേക്ക് പ്രോഗ്രസ് 91 ബഹിരാകാശ പേടകം ബഹിരാകാശ നിലയത്തിൽ ഡോക്ക് ചെയ്യപ്പെടും. തുടർന്ന് ക്രൂ കയറ്റുന്ന മാലിന്യങ്ങൾ സംസ്‍കരിക്കുന്നതിനായി ഭൂമിയുടെ അന്തരീക്ഷത്തിലേക്ക് കാര്‍ഗോ പേടകം തിരികെ പ്രവേശിക്കും.