ആവശ്യപ്പെട്ട ടിക്കറ്റിന് പകരം കിട്ടിയത് മറ്റൊന്ന്; തേടിയെത്തിയത് 17 കോടിയുടെ സമ്മാനം

മഹാഭാഗ്യം തേടിയെത്തുക എന്നൊക്കെ പറയില്ലേ. അക്ഷരാത്ഥത്തിൽ അങ്ങനെയൊന്ന് അമേരിക്കയിലെ കരോള്‍ടണ്‍ സ്വദേശിനിയായ കെല്ലി ലിന്‍ഡ്‌സേയ്ക്ക് അങ്ങനെ ഒരു ഭാഗ്യം കിട്ടിയിരിക്കുകയാണ്. ഇവർ ആവശ്യപ്പെട്ട ലോട്ടറി ടിക്കറ്റിന് പകരം കടയിലെ കാഷ്യര്‍ നല്‍കിയത് മറ്റൊരു ലോട്ടറിയുടെ ടിക്കറ്റ് ആണ്. ആദ്യമിവർക്ക് ദേഷ്യം വന്നുവെങ്കിലും കിട്ടിയ ടിക്കറ്റ് ചുരണ്ടിനോക്കിയപ്പോള്‍ അടിച്ചത് 17 കോടിയുടെ സമ്മാനമാണ്.

കഴിഞ്ഞമാസം കരോള്‍ടണ്‍ ബോള്‍വാഡിലെ റേസ് വേ കരോള്‍ടണ്‍ ഗ്യാസ് സ്‌റ്റേഷനില്‍നിന്നാണ് കെല്ലി ലോട്ടറി ടിക്കറ്റ് വാങ്ങിയത്. കെല്ലി ഒരു ടിക്കറ്റ് ആവശ്യപ്പെട്ടുവെങ്കിലും കാഷ്യര്‍ക്ക് പിഴവ് സംഭവിക്കുകയും അദ്ദേഹം മണി ബ്ലിറ്റ്‌സിന്റെ സ്‌ക്രാച്ച് ഓഫ് കാര്‍ഡ് അവര്‍ക്ക് നല്‍കുകയും ചെയ്യുകയായിരുന്നു.

ആവശ്യപ്പെട്ട ടിക്കറ്റ് കിട്ടാത്തതില്‍ കെല്ലിക്ക് ദേഷ്യം വന്നെങ്കിലും പാര്‍ക്കിങ്ങില്‍വെച്ച് ടിക്കറ്റ് അവര്‍ ചുരണ്ടിനോക്കി. അപ്പോഴാണ് രണ്ട് മില്യന്‍ ഡോളര്‍ (ഏകദേശം 17,32,35,500) സമ്മാനം അടിച്ചതായി മനസ്സിലാകുന്നത്. അതോടെ ദേഷ്യമൊക്കെ മാറി. നികുതി കിഴിച്ചതിന് ശേഷം 1.25 മില്യന്‍ ഡോളര്‍ കെല്ലിക്ക് ലഭിച്ചു.