ഒടുവില്‍ സ്വപ്നം സഫലം; ഔഡിയുടെ എസ്.യു.വി. സ്വന്തമാക്കി ലുക്മാന്‍ അവറാന്‍

വാഹനം സ്വന്തമാക്കിയതിന്റെ സന്തോഷം പങ്കുവെച്ചിരിക്കുകയാണ് നടന്‍ ലുക്മാന്‍ അവറാന്‍. ആഡംബര വാഹന നിര്‍മാതാക്കളായ ഔഡിയുടെ എസ്.യു.വി ആണ് താരം സ്വന്തമാക്കിയത്. ഒടുവില്‍ തന്റെ സ്വപ്നകാര്‍ സ്വന്തമാക്കിയെന്ന കുറിപ്പോടെയാണ് ലുക്മാൻ സന്തോഷവാര്‍ത്ത പങ്കുവെച്ചത്. കുടുംബത്തോടൊപ്പം എത്തിയാണ് താരം വാഹനം ഏറ്റുവാങ്ങിയത്. റോഡ് വേ കാര്‍സിന് നന്ദിയും അറിയിച്ചിട്ടുണ്ട്.

ഔഡി ക്യു 5 എന്തുകൊണ്ട് വാങ്ങി എന്നുചോദിച്ചാല്‍ കുറേ വണ്ടികള്‍ നോക്കിയിരുന്നു. പിന്നെ ഡിസ്‌കഷനൊക്കെ കഴിഞ്ഞ് പെട്ടെന്ന് ഇതിലേക്ക് എത്തുകയായിരുന്നു. ഔഡി എന്ന ബ്രാന്‍ഡിനോട് ആദ്യം മുതലേ ഒരു ഇഷ്ടമുണ്ടായിരുന്നു. അതുപോലെ ബിഎംഡബ്ല്യു, ബെന്‍സ് ഒക്കെ ഇഷ്ടമാണ്, നമ്മളൊക്കെ ചെറുപ്പം മുതലേ സ്വപ്നം കാണുന്ന വണ്ടികളല്ലേ… ഇപ്പോള്‍ ക്യു 5 വാങ്ങിക്കഴിഞ്ഞ ശേഷം ഒരുപാട് ഹാപ്പിയാണ്.

അങ്ങനെ സ്വപ്ന വാഹനമൊന്നുമില്ലന്നേ… ഓരോ സമയത്ത് ഓരോ ഇഷ്ടമല്ലേ.. അതിങ്ങനെ മാറിക്കൊണ്ടിരിക്കും. പുതിയ വാഹനങ്ങള്‍ കാണുമ്പോള്‍ അവയോട് ചിലപ്പോഴൊക്കെ ഇഷ്ടം തോന്നും. അതെല്ലാം സ്വന്തമാക്കാന്‍ സാധിക്കണമെന്നില്ലല്ലോ. ആദ്യ വാഹനം ഒരു പോളോ ആയിരുന്നു, ഒരു സെക്കന്‍ഡ് ഹാന്‍ഡ് പോളോ. പിന്നെ അത് വിറ്റ് ഒരു ബിഎംഡബ്ല്യു എക്‌സ് 1 എടുത്തു.

ഇരുചക്രവാഹനങ്ങള്‍ ഇല്ല. എന്റെ ബ്രദറിന്റെ ഒരു പാഷന്‍ പ്ലസ് ആണ് ഞാന്‍ ആദ്യം ഉപയോഗിച്ചിരുന്നത്. അതിനുമുന്‍പ് ഉപയോഗിച്ചിരുന്നത് ഒരു സുസുക്കി സമുറായ് ആണ്. പാഷന്‍ പ്ലസ്സുമായാണ് കോളേജിലും കോളേജിനുശേഷവുമെല്ലാം പോയിരുന്നത്. പിന്നെ കൊച്ചിയില്‍ താമസിക്കുമ്പോള്‍ എന്റെ ഫ്രണ്ട് നൗഫലിന്റെ സിബിസി അവനെനിക്ക് തന്നിട്ട് ഓഡിഷനു പോകാനും ചാന്‍സ് ചോദിക്കാനുമൊക്കെ ആ വണ്ടി ഉപയോഗിച്ചിരുന്നു. കൂട്ടുകാരുടെ വണ്ടികളാണ് അപ്പോഴൊക്കെ ഉപയോഗിച്ചിരുന്നത്. അവരെടുക്കുന്ന വണ്ടികളൊക്കെ ഓടിച്ചുനോക്കുക എന്നുള്ളതൊക്കെയായിരുന്നു.