ശൈശവ വിവാഹം കഴിഞ്ഞ് നേരെ സ്കൂളിലേക്ക്, ക്ഷേത്രത്തിന് മുന്നില്‍വെച്ച് ഇരുട്ടിലായിരുന്നു ചടങ്ങുകളെന്ന് പെൺകുട്ടി; വരനടക്കം അഞ്ച് പേര്‍ക്കെതിരെ കേസ്

കൃഷ്ണഗിരി: തമിഴ്‌നാട്ടിലെ കൃഷ്ണഗിരിയിൽ ശൈശവ വിവാഹം നടത്തിയതിൽ അഞ്ചുപേർക്കെതിരെ കേസെടുത്ത് പോലീസ്. 14 വയസ്സുകാരിയുടെ വിവാഹം നടത്തിയെന്ന പരാതിയിലാണ് നടപടി. വരനും മാതാപിതാക്കളും പെണ്‍കുട്ടിയുടെ മാതാപിതാക്കളും ഉള്‍പ്പെടെ അഞ്ച് പേര്‍ക്കെതിരെയാണ് പോലീസ് കേസെടുത്തത്. 25 കാരനാണ് 14 കാരിയെ വിവാഹം കഴിച്ചത്. വിവാഹം കഴിഞ്ഞ് പെണ്‍കുട്ടി സ്‌കൂളില്‍ താലി ധരിച്ചെത്തിയത് ശ്രദ്ധയില്‍പ്പെട്ടതോടെയാണ് സംഭവം പുറത്തു വന്നത്. ഇതേതുടർന്ന് സ്കൂൾ അധ്യാപകര്‍ സാമൂഹിക ക്ഷേമ വകുപ്പിനെ വിവരം അറിയിക്കുകയായിരുന്നു. പുലര്‍ച്ചെയാണ് പെണ്‍കുട്ടിയുടെ വിവാഹം നടന്നതെന്നും ശേഷം സ്‌കൂളിലേക്ക് വരികയായിരുന്നുവെന്നും സാമൂഹിക ക്ഷേമ വകുപ്പ് നടത്തിയ അന്വേഷണത്തില്‍ കണ്ടെത്തി.

അതേസമയം ഒരു ആഘോഷത്തിനായി താന്‍ പുതിയ വസ്ത്രങ്ങളും ആഭരണങ്ങളും വാങ്ങിച്ചെന്ന് 14 കാരി സുഹൃത്തുക്കളോട് പറഞ്ഞിരുന്നു. ശേഷം സ്‌കൂളിലേക്ക് വരുമെന്നും പെണ്‍കുട്ടി സുഹൃത്തുക്കളെ അറിയിച്ചിരുന്നു. എന്നാല്‍ വിവാഹ ശേഷം താലി ധരിച്ച് യൂണിഫോമില്‍ തന്നെയാണ് വിദ്യാര്‍ത്ഥി സ്‌കൂളിലെത്തിയത്. സുഹൃത്തുക്കള്‍ ഇതിനെക്കുറിച്ച് തിരക്കിയപ്പോള്‍ വിവാഹം കഴിഞ്ഞെന്ന് പെണ്‍കുട്ടി വെളിപ്പെടുത്തുകയും ചെയ്തിരുന്നുവെന്നാണ് വിവരം. ക്ഷേത്രത്തിന് മുന്നില്‍വെച്ച് ഇരുട്ടിലായിരുന്നു വിവാഹമെന്നും പെണ്‍കുട്ടി പറഞ്ഞിരുന്നു. പ്രായപൂർത്തിയാകാത്ത പെൺകുട്ടിയെ ശൈശവ വിവാഹം കഴിപ്പിച്ചതിലാണ് കുടുംബക്കാർക്കെതിരെ പോലീസ് കേസെടുത്തിരിക്കുന്നത്.