ഷൈനിനെ സിനിമകളില്‍ നിന്ന് മാറ്റി നിര്‍ത്തുമോ, ഫിലിം ചേമ്പര്‍ യോഗം നാളെ

കൊച്ചി: ഷൈന്‍ ടോം ചാക്കോ വിഷയത്തില്‍ നാളെ ഫിലിം ചേമ്പര്‍ കൊച്ചിയില്‍ യോഗം ചേരും. വിവാദങ്ങളുടെ പശ്ചാത്തലത്തില്‍ ഷൈനിനെ സിനിമകളില്‍ നിന്ന് മാറ്റി നിര്‍ത്താന്‍ സിനിമ സംഘടനകളോട് ചേമ്പര്‍ ശുപാര്‍ശ ചെയ്തേക്കും. നാളെ കൊച്ചിയില്‍ നടക്കുന്ന യോഗത്തില്‍ സൂത്രവാക്യം സിനിമയുടെ അണിയറ പ്രവര്‍ത്തകരും, സിനിമയിലെ ഐസിസി അംഗങ്ങള്‍ തുടങ്ങിയവര്‍ പങ്കെടുക്കും. വിന്‍സിയെയും ഷൈന്‍ ടോം ചാക്കോയെയും കേട്ട ശേഷമായിരിക്കും നടപടി. താരസംഘടന അമ്മയും ഷൈന്‍ ടോം ചാക്കോയില്‍ നിന്ന് വിശദീകരണം തേടിയിട്ടുണ്ട്. നാളെക്കുള്ളില്‍ വിശദീകരണം നല്‍കാനാണ് നിര്‍ദേശം.

ലഹരി ഉപയോഗിക്കുന്നവര്‍ക്കൊപ്പം അഭിനയിക്കില്ലെന്ന് നടി വിന്‍സി അലോഷ്യസ് അടുത്തിടെ പറഞ്ഞ വീഡിയോ വൈറലായിരുന്നു. ഇതിന് പിന്നാലെ നടിക്കെതിരെ സൈബര്‍ ആക്രമണവും നടന്നിരുന്നു. പ്രസ്തുത തീരുമാനം എടുക്കാനുള്ള കാരണം വ്യക്തമാക്കിക്കൊണ്ട് പിന്നാലെ വിന്‍സി സോഷ്യല്‍ മീഡിയയില്‍ പോസ്റ്റ് ചെയ്ത വീഡിയോ പ്രതികരണം വൈറല്‍ ആയിരുന്നു. ഒരു പ്രധാന നടന്‍ ഒരു ചിത്രത്തിന്റെ സെറ്റില്‍ പരസ്യമായി ലഹരി ഉപയോഗിച്ച് ശല്യമുണ്ടാക്കിയെന്നാണ് വീഡിയോയില്‍ വിന്‍സി പറഞ്ഞത്.