ഓടിക്കൊണ്ടിരുന്ന ഓട്ടോയില്‍ പെൺകുട്ടിയെ പീഡിപ്പിച്ചു; പോലീസ് പിന്നാലെ എത്തിയതോടെ 18 വയസുകാരിയെ റോഡിൽ ഉപേക്ഷിച്ച് അക്രമികൾ കടന്നുകളഞ്ഞു

ചെന്നൈ: പതിനെട്ടുവയസ്സുകാരിയായ അതിഥിത്തൊഴിലാളിയെ ലൈംഗികമായി പീഡിപ്പിച്ചു. തിങ്കളാഴ്ച രാത്രി തമിഴ്നാട്ടിലാണ് സംഭവമുണ്ടായത്. ബസ് കാത്തുനിൽക്കുകയായിരുന്ന പെൺകുട്ടിയെ ഓട്ടോയിലെത്തിയ മൂന്നംഗ സംഘം വാഹനത്തിലേക്ക് വലിച്ചു കയറ്റിയ ശേഷം കത്തി കാണിച്ച് ഭീഷണിപ്പെടുത്തി ലൈംഗികമായി പീഡിപ്പിക്കുകയായിരുന്നു.

ഓടിക്കൊണ്ടിരുന്ന ഓട്ടോ റിക്ഷയില്‍നിന്ന് പെണ്‍കുട്ടിയുടെ നിലവിളികേട്ട ആളുകളാണ് പോലീസിനെ വിവരം അറിയിച്ചത്. ഇതോടെ പെണ്‍കുട്ടിയെ വഴിയില്‍ ഇറക്കിവിട്ട ശേഷം അക്രമികള്‍ കടന്നുകളഞ്ഞു.

കിലാമ്പാക്കം ബസ് ടെര്‍മിനലിന് പുറത്ത് നില്‍ക്കുകയായിരുന്നു പെണ്‍കുട്ടി. ഈ സമയത്ത് ഒരു ഓട്ടോറിക്ഷ എത്തുകയും കൊണ്ടുപോയി വിടാമെന്ന് ഡ്രൈവര്‍ പറയുകയും ചെയ്തു. എന്നാല്‍, ഇത് പെണ്‍കുട്ടി നിരസിച്ചു. തുടര്‍ന്ന് ഡ്രൈവര്‍ പെണ്‍കുട്ടിയെ വലിച്ച് ഓട്ടോറിക്ഷയുടെ അകത്തേക്കിട്ടു. തൊട്ടുപിന്നാലെ മറ്റ് രണ്ട് പുരുഷന്മാര്‍കൂടി ഓട്ടോയില്‍ കയറുകയും കത്തിമുനയില്‍ ലൈംഗിക അതിക്രമത്തിനിരയാക്കുകയുമായിരുന്നു.

ലഭ്യമായ വിവരത്തിന്റെ അടിസ്ഥാനത്തിൽ പോലീസ് ഓട്ടോയുടെ പിന്നാലെയെത്തിയെങ്കിലും പെണ്‍കുട്ടിയെ റോഡില്‍ ഉപേക്ഷിച്ച് അക്രമികള്‍ കടന്നുകളഞ്ഞു. അന്തർസംസ്ഥാനക്കാരിയായ പെൺകുട്ടി തമിഴ്‌നാട്ടിലെ സേലത്ത് ജോലി ചെയ്തു വരികയായിരുന്നു