മുസ്ലീം ലീ​ഗ് നേതാവ് ക്ഷേത്രത്തിന് സമീപത്ത് വച്ച് മാംസാ​ഹാരം കഴിച്ചെന്ന് ആരോപണം; ലീ​ഗ് എംപിയെ പുറത്താക്കണമെന്ന് ബിജെപി

ചെന്നൈ: മുസ്ലീം ലീ​ഗ് നേതാവ് ക്ഷേത്രത്തിന് സമീപത്ത് വച്ച് മാംസാ​ഹാരം കഴിച്ചെന്ന ആരോപണവുമായി ബിജെപി. മധുരയിലുളള തിരുപറംകുണ്ഡ്രം സുബ്രഹ്മണ്യം സ്വാമി ക്ഷേത്രത്തിന്റെ കുന്നിൽ വച്ച് മുസ്‌ലിം ലീ​ഗ് എംപിയായ നവാസ് കനി മാംസാഹാരം കഴിച്ചെന്നാണ് ആരോപണം. എംപിയെ പുറത്താക്കണമെന്നാവശ്യപ്പെട്ട് തമിഴ്നാട് ബിജെപി സംസ്ഥാന പ്രസിഡന്റ് അണ്ണാമലൈ രം​ഗത്തെത്തി.

ക്ഷേത്രത്തിന്റെ കുന്നിൽ വച്ച് എംപി മാംസം കഴിച്ചത് അങ്ങേയറ്റം നിർഭാ​ഗ്യകരമായ സംഭവമാണെന്ന് അണ്ണാമലൈ പറഞ്ഞു. ഹിന്ദു സമൂഹം വളരെ സമാധാനപ്രിയരാണ്. ക്രമസമാധാന പ്രശ്നം സൃഷ്ടിച്ച എംപിയെ പുറത്താക്കണമെന്നും അണ്ണാമലൈ പറഞ്ഞു. ജനങ്ങൾക്കിടയിൽ വിഭാ​ഗീയതയുണ്ടാക്കാൻ ലക്ഷ്യമിട്ടുളള നടപടിയാണ് എം പിയുടെ ഭാ​ഗത്ത് നിന്നുണ്ടായത്. സുബ്രഹ്മണ്യം ക്ഷേത്രത്തിന്റെ സ്ഥാനത്ത് വച്ച് മാംസം കഴിക്കുന്നത് അം​ഗീകരിക്കാനാവില്ലെന്നും അണ്ണാമലൈ എക്സിൽ കുറിച്ചു.

അതേസമയം അണ്ണാമലൈയുടെ ആരോപണം അടിസ്ഥാനരഹിതമാണെന്ന് നവാസ് കനി പറഞ്ഞു. കുന്നിൽ വച്ച് താൻ മാംസം കഴിച്ചിട്ടില്ലെന്നും നവാസ് കനി വ്യക്തമാക്കി. പ്രദേശത്ത് ഇരുവിഭാ​ഗങ്ങൾ തമ്മിലുണ്ടായ സംഘർഷമുണ്ടായപ്പോൾ അതിന് മധ്യസ്ഥത വഹിക്കാനാണ് താൻ സുബ്രഹ്മണ്യം സ്വാമി ക്ഷേത്രത്തിന്റെ കുന്നിലേക്ക് എത്തിയതെന്ന് എം പി വ്യക്തമാക്കി.

കഴിഞ്ഞ ദിവസം തിരുപറംകുണ്ഡ്രം സുബ്രഹ്മണ്യം സ്വാമി ക്ഷേത്രത്തിന് സമീപം ഇരു വിഭാ​ഗങ്ങൾ തമ്മിൽ തർക്കമുണ്ടായിരുന്നു. കുന്നിലേക്ക് മൃ​ഗങ്ങളെ ബലിയർപ്പിക്കാൻ മുസ്‌ലിം സമുദായംഗങ്ങൾ കൊണ്ടുപോകുന്നതിനെ ഒരുവിഭാ​ഗം എതിർത്തു. ഇതിനു പിന്നാലെ പൊലീസ് ഇടപെട്ടു. പൊലീസും മൃ​ഗബലി അനുവദിക്കാനാകില്ലെന്ന് നിലപാടെടുത്തതോടെ സംഘർഷാവസ്ഥ സംജാതമാകുകയായിരുന്നു.